ചായയുടെ റെസിപ്പി

ചായയുടെ പാചകക്രമം എന്ന പേരിൽ പണ്ടെഴുതിയതാണ്. ചെറിയ വ്യത്യാസത്തോടെ വീണ്ടും.

ഇത് പിന്തുടർന്ന് ചായയുണ്ടാക്കിയവർക്ക് ഒരു കൊല്ലത്തേയ്ക്കുള്ള ചായപ്പൊടി സൌജന്യമായി കിട്ടിയിട്ടുണ്ട്. ഇത് അവഗണിച്ചവർ ചായയുണ്ടാക്കിയപ്പോൾ പാൽ തിളച്ചു തൂവി അടുപ്പ്/സ്റ്റൌ/മൈക്രോവേവ് നാശമായി. ഇങ്ങനെ ഉണ്ടാക്കിയ ചായയുടെ പടടം ഇൻസ്റ്റയിലിട്ടവർക്ക് ചുമ്മാ നടക്കാനിറങ്ങിയപ്പോൾ DSLR കളഞ്ഞുകിട്ടി. ചായയുടെ പടത്തിനു പകരം, പരിസ്ഥിതി ദിനമാണെന്ന കാരണം പറഞ്ഞ് ആമ്പലിന്റെ പടമെടുക്കാൻ പോയവരുടെ ഫോൺ വെള്ളത്തിൽ വീണ് കേടായിപ്പോയി. ഇത് ലൈക്ക് ചെയ്തവർക്ക് ജീവിതത്തിലും ലൈക്കുണ്ടായി. കണ്ടിട്ടും കാണാതെ പോയവരെ ഷോർട്ട്ഫിലിമിലെടുത്തു.

ഇനി എല്ലാം നിങ്ങളുടെ ഇഷ്ടം.

പച്ചവെള്ളമൊരരത്തുടം പതിയെ വച്ചു തീയടിയിലേകണം
ഒച്ചയോടതു തിളച്ചിടുമ്പൊഴതിലിറ്റു തേയില പകർത്തണം,
മെച്ചമാം പുതിയ പാലൊഴിച്ചു, രുചികിട്ടുവാൻ സിത കലക്കണം,
സ്വച്ഛമിങ്ങനെ പചിച്ച ചായ, കടിയോടുതാനുടനടിക്കണം.

(കുസുമമഞ്ജരി)