ശാന്തയായ് മാറ്റണേ!

Happy Mother's Day!

തങ്കമാം തള്ളമാർക്കൊക്കെയും രാവിലേ
തുംഗതത്തോടുമാശംസകൾ ചൊല്ലിയാൻ
ശങ്കയായ്, വീട്ടുകാരിക്കു ഞാൻ നേർന്നുവോ?
ശങ്കരാ! കാന്തയെശ്ശാന്തയായ് മാറ്റണേ!

(വൃത്തം: സ്രഗ്വിണി)

വേറുതേ, എന്തിനീ മത്സരം?

അന്തിനേരം വിടർന്നന്തരീക്ഷം മുദാ-
ഗന്ധമേകും നറും സുന്ദരിപ്പൂവുകൾ
ചന്തമായ് ചേലെഴും ചന്ദ്രികയ്‌ക്കൊപ്പമായ്
ഹന്ത! നിന്മുന്നിലിന്നെന്തിനീ മത്സരം?

(വൃത്തം: സ്രഗ്വിണി -- സ്രഗ്വിണിക്കോ ഗണം നാലു രം താനതും.)

വാർഷികാഘോഷനാൾ

ശ്ലോകമില്ലാതെഴും വാർഷികാഘോഷനാൾ
ശോകമാകാതെ നീ കാത്തുകൊള്ളേണമേ,
ആകെമൊത്തം തിരക്കായിരിക്കുമ്പൊഴു-
മാകുലത്താലുമുൾത്താരു കത്തുന്നു, മേ!

നടുവത്തച്ഛൻ നമ്പൂതിരിയുടെ ഭഗവദ്ദൂത്‌ നാടകം കൃതിയിൽ "ഉൾത്താരു കത്തുന്നു മേ" എന്നവസാനിക്കുന്ന രണ്ട് ശ്ലോകങ്ങൾ ഉണ്ട്.

(വൃത്തം: സ്രഗ്വിണി)

സ്രഗ്വിണി ലക്ഷണം വൃത്തമഞ്ജരിയിൽ സ്രഗ്വിണിയിൽ പറഞ്ഞിട്ടില്ല. അതിനാൽ സ്രഗ്വിണിയിൽ സ്രഗ്വിണിയുടെ ലക്ഷണം ഇതാ:

സ്രഗ്വിണിക്കോ ഗണം നാലു രം താനതും.