അമ്പത്തൊന്നക്ഷരം

ഒരു അക്ഷരശ്ലോക സദസ്സ്. ആദ്യവട്ടം എല്ലാവരും ആലപിക്കുന്നത് അമ്പത്തൊന്നക്ഷരം എന്നു തുടങ്ങുന്ന ശ്ലോകങ്ങൾ. തൊട്ടടുത്തയാളും അമ്പത്തൊന്നക്ഷരം എന്നു തുടങ്ങുന്ന ശ്ലോകം ചൊല്ലേണ്ടതുകൊണ്ട് മൂന്നാം വരി അ-യിൽ തുടങ്ങണം. എല്ലാം സ്രഗ്ദ്ധരയിൽ.

കുറേ നോക്കിയിട്ടും എല്ലാ മാനദണ്ഡവും പാലിക്കാനായില്ല. അമ്പത്തൊന്നക്ഷരം എന്നു തുടങ്ങുന്ന, സ്രഗ്ദ്ധരയിൽ എഴുതിയ, മൂന്നാം വരി അ-യിൽ തുടങ്ങാത്ത ഒരു ശ്ലോകം:

അമ്പത്തൊന്നക്ഷരത്താൽ വരമൊഴിപഠനം നാന്ദിയാകുന്ന നേര-
ത്തിമ്പത്താൽക്കൂട്ടമോടേ ഗുരുവിനറിവിനായ് ശിഷ്യരോതുന്നിതല്ലോ:
സമ്പത്തിന്നല്ല മോഹം, പ്രിയതരവിഷയം കൌതുകത്താൽ പഠിക്കാൻ,
കമ്പത്തോടാസ്വദിക്കാൻ, കരുണയരുളണം, വിദ്യയർത്ഥിച്ചു നില്പൂ!

വൃത്തം: സ്രഗ്ദ്ധര (ഏഴേഴായ് മൂന്നു ഖണ്ഡം മരഭനയയയം സ്രഗ്ദ്ധരാവൃത്തമാകും)

ആയുരാരോഗ്യസൗഖ്യം!

ആയുരാരോഗ്യസൗഖ്യം എന്ന വരിയിൽ അവസാനിക്കുന്ന ഒരു സമസ്യ ഏഴു പേരുള്ള ഒരു ശ്ലോകഗ്രൂപ്പിൽ സജിത്ത് (പോസ്റ്റുമാൻ/സിദ്ധാർത്ഥൻ) അവതരിപ്പിച്ചു. അതിന് ഉമേഷ് ഒരു വാശിയെന്ന പോലെ സ്രഗ്ദ്ധര, ശാലിനി, മാലിനി, മന്ദാക്രാന്ത, മേഘവിഷ്ഫൂർജ്ജിതം, ചന്ദ്രലേഖ എന്നീ ആറു വൃത്തങ്ങളിൽ ആറു പൂരണങ്ങൾ ആറു പേരെപ്പറ്റി എഴുതി. (ഗ്രൂപ്പിൽ ഒരാൾ കൂടി ഉണ്ടായിരുന്നെങ്കിൽ ഉമേഷ് ഒരു വൃത്തം കൂടി കണ്ടുപിടിപ്പിച്ച് സമസ്യ പൂരിപ്പിച്ചേനെ.

എന്നെപ്പറ്റി എഴുതിയത് ശാലിനി (നാലേഴായ് മം ശാലിനീ തംതഗംഗം) വൃത്തത്തിലാണ്.

എന്നും ശ്ലോകം നൽകിടും, കൂട്ടുകാർക്കോ
സന്തോഷത്തെക്കോക്ക്ടെയിൽക്കൂട്ടിനാലും,
ഇന്നീ വണ്ണം വന്നിടട്ടേ മഹാനാം
സന്തോഷിന്നായായുരാരോഗ്യസൗഖ്യം!

പ്രൈവസി സൂക്ഷിക്കുന്നതിനായി ഉമേഷ് എഴുതിയ മറ്റുശ്ലോകങ്ങൾ ഇവിടെ ഇടുന്നില്ല എങ്കിലും എഡിറ്റു ചെയ്ത അവസാന വരി ഇതാ:

ചന്ദ്രലേഖ: നസരരഗ കേൾ ചന്ദ്രലേഖാഖ്യമാറാൽ

---
---
---
ദിനവുമതിയായായുരാരോഗ്യസൗഖ്യം!

മാലിനി: നനമയയുഗമെട്ടിൽത്തട്ടണം മാലിനിയ്ക്ക്.

---
---
---
വരുവതിനമൃതം പോലായുരാരോഗ്യസൗഖ്യം!

മന്ദാക്രാന്ത: മന്ദാക്രാന്താ മഭനതതഗം നാലുമാറേഴുമായ് ഗം.

---
---
---
വന്നീടട്ടേ നിറയെ "രരര" യ്ക്കായുരാരോഗ്യസൗഖ്യം! (Edited)

മേഘവിഷ്ഫൂർജ്ജിതം: മുറിഞ്ഞാറാറേഴും യമനസരരം മേഘവിഷ്ഫൂർജ്ജിതം ഗം.

---
---
---
"രരാരാരാരാ" നൽകീടണമതുലമായായുരാരോഗ്യസൗഖ്യം! (Edited)

സ്രഗ്ദ്ധര: ഏഴേഴായ് മൂന്നു ഖണ്ഡം മരഭനയയയം സ്രഗ്ദ്ധരാവൃത്തമാകും.

---
---
---
യ്ക്കെന്നും നിൽക്കുന്നൊരീ രാരര വരുമതിയായായുരാരോഗ്യസൗഖ്യം!

നമ്മളെ ശ്ലോകത്തിലാക്കി ഇത്രയും സമസ്യാപൂരണങ്ങൾ അവതരിപ്പിച്ച ഉമേഷിന് വിതാനം എന്ന വൃത്തത്തിൽ ഞാൻ എഴുതിയ ഒരു പൂരണം ഇതാ. ജതം വിതാനം ഗഗം കേൾ എന്നാണ് വിതാനം വൃത്തത്തിന്റെ ലക്ഷണം.

ഉമേഷിനാൽ ശ്ലോകമാകാൻ
പ്രമാദമായ് പോസു ചെയ്യും
സുമോഹനക്കാരു സർവ്വർ-
ക്കുമായുരാരോഗ്യസൗഖ്യം!

യമകം പലമാതിരി

നവംബർ 11-ആയിട്ട് സ്രഗ്ദ്ധരയിൽ യമകമൊക്കെ വച്ച് ഒരു അലക്ക് അലക്കാം എന്ന് ആദ്യം വിചാരിച്ചത് കഴിഞ്ഞ വർഷമാണ്. തിരക്കിലായിപ്പോയി. ഈ വർഷം തിരക്കാണെങ്കിലും വേൽ മുരുഹൻ മുന്നിൽക്കൂടി കടന്നു പോകുന്നതിനാൽ വിളിച്ചു നിർത്തി ഒരു റിക്വസ്റ്റ് കൊടുത്തേക്കാം എന്നുവച്ചു.

പത്തും പിന്നൊമ്പതാണ്ടും സമരസുഖദമായ് പാതതാണ്ടും; കടിക്കും
കുത്തും പങ്കാളിയോടും; സമരസതവരും! വീണ്ടുമെന്നും ശഠിക്കും!
പുത്തൻ പാഠങ്ങളേതും പലസിലബസിലും കണ്ടിടാതേ പഠിച്ചി-
ട്ടെത്തീയൊന്നിച്ചുരണ്ടാൾ, വരുക മുരുക, നിൻ സിമ്പതിപ്പൂ പതിപ്പൂ!

(സ്രഗ്ദ്ധര)

PS: "ഭക്തർക്കിഷ്ടം കൊടുക്കും" എഴുതിയ ശീവൊളളി ക്ഷമിക്കുമായിരിക്കും. മലയാളം MA-യ്ക്കൊക്കെ പഠിക്കുന്നവർ യമകം എന്താവരുത് എന്നതിന് ഉദാഹരണമായി ഈ ശ്ലോകം ഉപയോഗിക്കാൻ മുൻകൂർ അനുവാദം തന്നിരിക്കുന്നു.

അമ്മ

ബാല്യത്തിങ്കൽ സഹിച്ചൂ സകലവികൃതിയും പീലികൊണ്ടേ പെടയ്ക്കൂ
ചേലൊത്താലോ ചതയ്ക്കും ചെറിയപുളിമരം ചേർത്തു നിർത്തിക്കൗമാരേ!
കാലത്തായാൽ തുടങ്ങും ചെവിയി, “ലതരുതെ”, ന്നോതുമാ യൗവ്വനത്തിൽ,
സ്നേഹത്തോടേ തരുന്നൂ, തിരികെ പലിശയും ചേർത്തൊരാശംസ, യമ്മേ!

Alternate version:

ബാല്യത്തിങ്കൽക്കുറച്ചൂ സകലവികൃതിയും, പീലികൊണ്ടേ പെടയ്ക്കൂ;
ചേലൊത്താലോ ചതച്ചൂ ചെറിയപുളിമരം തന്റെ കൊമ്പാൽക്കൗമാരേ;
കാലത്തായാലുറച്ചൂ ചെവിയിലതരുതെ, ന്നോതിടും യൗവ്വനത്തിൽ;
താലത്തിന്മേൽ പിടിച്ചോ, തിരികെ പലിശയും ചേർത്തൊരാശംസ, യമ്മേ!

(സ്രഗ്ദ്ധര)