നടുപ്പേജു കീറി

സിതാരാ കൃഷ്ണകുമാറും Dabzee-യും ചേർന്ന് 11 പ്രാവശ്യം നടുപ്പേജു കീറിയകാര്യം ഇൻസ്റ്റവഴി നിങ്ങൾ അറിഞ്ഞിരിക്കുമല്ലോ.

ഒറിജിനൽ വരികൾ പകുതിയും വാക്കുകൾ കൊണ്ടുള്ള കളിയാണ് (wordplay). അതല്ല കാര്യം. ഇൻസ്റ്റയിലെ കമന്റുകളാണ് ഹൈലൈറ്റ്.

ചില സാമ്പിളുകൾ:

"കീറിയത് കീറി... രണ്ടുപേരും കൂടി പുതിയ ബുക്ക്‌ മേടിച്ച് ബാക്കി വരി എഴുതാൻ നോക്ക്..."

"ഇതിലും എത്രയോ ഭേദം ആയിരുന്നു നിറം സിനിമയിലെ പ്രകാശ്, പേജ് പറന്നു പോയിട്ടും അയാള് മൂളി അഡ്ജസ്റ്റ് ചെയ്തു പരാതി ഒന്നും പറഞ്ഞു നടന്നില്ല."

ഇത്രയുമായ സ്ഥിതിക്ക് ഒരു ശ്ലോകം നിർബന്ധമാണ്.

നടുപ്പേജു കീറിപ്പറക്കുന്നനേരം
നടുക്കം നടിക്കാതെ പാടിത്തകർത്തൂ
മിടുക്കൻ കിടാങ്ങൾ മടിക്കാതെയെത്തീ
കിടുക്കം കമന്റാൽ ചിരിപ്പിച്ചു കൊല്ലാൻ!

(വൃത്തം: ഭുജംഗപ്രയാതം. ലക്ഷണം: യകാരങ്ങൾ നാലോ ഭുജംഗപ്രയാതം)

നമുക്കും തുണയ്ക്കാം

നിലയ്ക്കാത്ത മാരിക്കൊടുക്കം തകർന്നി-
ട്ടൊലിച്ചെത്തി, കുന്നിന്റെ മേലുള്ള മണ്ണും
പൊലിഞ്ഞെത്ര ജന്മം! നമുക്കും തുണയ്ക്കാ-
മലംഭാവമില്ലാതെ ഡിസ്ട്രസ്സു ഫണ്ടാൽ.

വയനാട് ദുരന്തത്തെത്തുടർന്ന് എഴുതിയത്.

(ഭുജംഗപ്രയാതം)

വിളക്കില്ല കയ്യിൽ

പിളർക്കുന്നു രാജ്യം, ഹനിക്കുന്നു ധർമ്മം,
വളഞ്ഞിട്ടു കൊല്ലുന്നു വേതാളവൃന്ദം!
പൊളിച്ചും തകർത്തും തുലയ്ക്കാൻ പിറന്നോർ
തെളിക്കാൻ പറഞ്ഞാൽ വിളക്കില്ല കയ്യിൽ!

വൃത്തം: ഭുജംഗപ്രയാതം

പ്രിയേ ചാരുശീലേ!

നിരാലംബനായിട്ടുഴന്നൂ രമേശൻ,
ഇരപ്പാളിയായ്‌ ശംഭു, വർക്കൻ കറങ്ങും

എന്നും

ഉടുത്തുള്ള പട്ടൊന്നു മേൽപ്പോട്ടൊതുക്കി-
ത്തിടുക്കെന്നരക്കെട്ടു ധൃഷ്ടം മുറുക്കി

എന്നുമൊക്കെയല്ലാതെ ഭുജംഗപ്രയാതത്തിൽ ശൃംഗാരശ്ലോകങ്ങൾ കണ്ടിട്ടില്ല.

പക്ഷേ എനിക്കിവിടെ ഞാൻ പഠിച്ചതിനെയൊക്കെ നിഷേധിച്ചേ പറ്റൂ. ഒരു ശ്ലോകമെഴുത്തുകാരനും സഞ്ചിരിക്കാത്ത വഴികളിലൂടെയൊക്കെ ഞാൻ സഞ്ചരിച്ചെന്നിരിക്കും. നമ്മുടെ ആനിവേഴ്സറിക്കുവേണ്ടി. I am going to break all conventional concepts of ശ്ലോകമെഴുത്ത്.

തലേനാളിലെത്തർക്കമെല്ലാം മറക്കാം
ബലേഭേഷു ചൊന്നിട്ടു വീണ്ടും രമിക്കാം
അയേ നായികേ, തങ്കമാം പ്രാണനാഥേ,
പ്രിയേ ചാരുശീലേ, മനസ്സെന്തു ചൊൽവ്വൂ?

വൃത്തം: ഭുജംഗപ്രയാതം

മുടന്തി നീ നടക്കുമോ?

Tell me, if I caught you one day
And kissed the sole of your foot,
Wouldn't you limp a little then,
Afraid to crush my kiss?

റൊമേനിയൻ കവിയായ Nichita Stănescu വിന്റെ ഈ കവിതയുടെ ഒരു മലയാള പരിഭാഷ അടുത്തകാലത്ത് കണ്ണിൽപ്പെട്ടു. പരിഭാഷ ഫേസ്ബുക്ക് സ്ട്രീമിലും മെസ്സേജുകളായും പലതവണ കണ്ടതിനാൽ വളരെ സ്വീകാര്യതയുള്ളതായി തോന്നിയെങ്കിലും എനിക്ക് ഒട്ടും ഇഷ്ടപ്പെട്ടില്ല. അതിനാൽ സ്വയം പരിഭാഷപ്പെടുത്തുന്നു.

ആദ്യം ഒരു മിനിമലിസ്റ്റ് വൃത്തമാണ് നോക്കിയത്. പഞ്ചചാമരത്തിനെ നേർപകുതിയായി മുറിച്ച പ്രമാണിക.

പിടിച്ചൊരിക്കൽ നിന്റെ കാൽ-
പ്പദത്തിലുമ്മവയ്ക്കുകിൽ
മുടന്തുമോ, ഹ! ചുംബനം
ഞെരിഞ്ഞിടാതിരിക്കുവാൻ?

പക്ഷേ ഇത് മാത്രം വായിച്ചാൽ എന്തിനാ മുടന്തുന്നത് എന്ന് മനസ്സിലാവാൻ സാധ്യതയില്ലല്ലോ. മാത്രമല്ല, മൂന്നാം വരിയിലെ ഹ! ഒഴിവാക്കാൻ നോക്കിയിട്ട് പറ്റുന്നുമില്ല.

എന്നാൽപ്പിന്നെ അല്പം കൂടി വലിയവൃത്തമായ ഭുജംഗപ്രയാതത്തിൽ ആകാം എന്നുവച്ചു.

പിടിച്ചിട്ടൊരിക്കൽപ്പദത്തിൽപ്പതുക്കെ
മുകർന്നെന്നു വന്നാൽ, സഖേ, ചൊല്ലുമോ നീ:
നിനക്കായി ഞാൻ തന്നൊരാച്ചുംബനങ്ങൾ
ഞെരിക്കും ഭയത്താൽ മുടന്തില്ലെ, നീയും?

ഒറിജിനലിനോട് നീതിപുലർത്തുന്ന പരിഭാഷയാണിത്. എങ്കിലും ഭുജംഗപ്രയാതം പ്രണയം പ്രകടിപ്പിക്കാൻ പറ്റിയ വൃത്തമല്ലാത്തതിനാൽ പൊടിപ്പും തൊങ്ങലും ചേർക്കേണ്ടി വന്നാലും അല്പംകൂടി വലിയ വൃത്തമായ പഞ്ചചാമരം ചേരുമെന്ന് തോന്നി.

പിടിച്ചൊരിക്കൽ നിന്നെ നിന്റെ പാദപത്മമാകവേ
നിറച്ചു ചുംബനങ്ങളേറെ രാഗമോടെ നല്കിയാൽ
മുടന്തി നീ നടക്കുമോ, മനം കവർന്നൊരുമ്മകൾ-
ചതഞ്ഞരഞ്ഞുപോകുമെന്ന ഭീതിയാൽ, നിരന്തരം?

ഇതിന്റെ അവസാനവരിയിൽ നിരന്തരം എന്നതിനു പകരം മനോഹരീ എന്നാണ് ആദ്യം എഴുതിയത്. എന്നാൽ ഒറിജിനലും പ്രമാണികയിലും ഭുജംഗപ്രയാതത്തിലും എഴുതിയ പരിഭാഷകളും ലിംഗനിഷ്പക്ഷമായതിനാൽ (gender neutral) മനോഹരീ മാറ്റി നിരന്തരം എന്നാക്കുകയായിരുന്നു. ഇങ്ങനെയാണ് ആദ്യം എഴുതിയത്:

പിടിച്ചൊരിക്കൽ നിന്നെ നിന്റെ കാൽപ്പദത്തിലാകവേ
പടുത്വമോടെ ഞാൻ നിറച്ചു ചുംബനങ്ങളേകിയാൽ
മുടന്തി നീ നടക്കുമോ, നിറം പകർന്നൊരുമ്മകൾ-
ചതഞ്ഞരഞ്ഞുപോകുമെന്ന ഭീതിയാൽ, മനോഹരീ?

കടക്കൂ പുറത്ത്!

സമസ്യാപൂരണം

പടത്തിൽക്കറുത്തോരു വൃദ്ധന്റെ വേഷം
നടിക്കാൻ പറഞ്ഞപ്പൊഴാണെന്റെ പൊന്നേ
അടിക്കാനെണീറ്റിട്ടു വേണ്ടെന്നു വച്ചാൻ
കടക്കൂ പുറത്തെന്നു കല്പിച്ചു മുഖ്യൻ!

വൃത്തം: ഭുജംഗപ്രയാതം (യകാരങ്ങൾ നാലോ ഭുജംഗപ്രയാതം)

ദിവ്യ

നമ്മുടെ ഇരുപതാം വിവാഹവർഷികത്തിന് ദിവ്യ എന്ന ഒരു പുതിയ സംസ്കൃതവൃത്തം അവതരിപ്പിക്കുന്നു.

'സ'ഗണം കഴിഞ്ഞ് മൂന്ന് 'യ'ഗണം വരുന്ന സമവൃത്തമാണ് ദിവ്യ (സമവായം എന്നൊന്നും വരികൾക്കിടയിൽ വായിക്കരുത്).

വൃത്തങ്ങളുടെ ലക്ഷണം സാധാരണ ആ വൃത്തത്തിൽത്തന്നെയാണ് പറയാറുള്ളത്. അതിനാൽ, ദിവ്യ എന്ന വൃത്തത്തിന്റെ ലക്ഷണം "സയയം യ ചേർന്നാലതാകുന്നു ദിവ്യ" എന്നു നിശ്ചയിച്ചിരിക്കുന്നു. (ഈ വരി ദിവ്യ വൃത്തത്തിലാണ്.)

ദിവ്യ വൃത്തത്തിൽ എഴുതിയ ഒരു ശ്ലോകം:

അരികത്തിരുന്നിട്ടു തല്ലിത്തളർന്നും
കരമൊത്തു നൃത്തം ചവുട്ടിത്തിമിർത്തും
പരുവത്തിലൊക്കെസ്സുഖിച്ചും തപിച്ചും
ഇരുപത്തു കൊല്ലം കഴിഞ്ഞെത്ര വേഗം!

ദിവ്യ വൃത്തം നല്ല താളാത്മകമാണ്. സംസ്കൃതത്തിലെ മറ്റുചില വൃത്തങ്ങളുമായി ദിവ്യയ്ക്ക് അടുപ്പവും സാദൃശ്യവുമുണ്ട്.

ഉദാഹരണമായി,

• ഭുജംഗപ്രയാതത്തിന്റെ (യകാരങ്ങൾ നാലോ ഭുജംഗപ്രയാതം) നാലു യഗണങ്ങളിൽ ആദ്യ യഗണം സഗണം ആയാൽ ദിവ്യ ആയി. അതായത്, ഭുജംഗപ്രയാതത്തിന്റെ രണ്ടാമക്ഷരം ഗുരുവിൽ നിന്നും ലഘു ആകുന്നു.
• കോകരതത്തിന്റെ (സയസം യവും കോകരതാഖ്യവൃത്തം) രണ്ടാം സഗണം യഗണം ആയാൽ ദിവ്യ. അതായത്, കോകരതത്തിന്റെ എട്ടാം അക്ഷരം ലഘുവിൽ നിന്നും ഗുരു ആകുന്നു. (ഇന്ദ്രവജ്രയുടെ ആദ്യഗുരുവിനു പകരം രണ്ടു ലഘുക്കളായാൽ കോകരതമായി.)
• ഇന്ദ്രവജ്രയിൽ (കേളിന്ദ്രവജ്രയ്ക്കു തതം ജഗംഗം) ഏഴാമക്ഷരം ഗുരുവായാൽ കല്യാണി എന്ന വൃത്തമാവും (കല്യാണി തഗണം മൂന്നു ഗുരുരണ്ടോടു ചേരുകിൽ). കല്യാണിയുടെ ആദ്യഗുരുവിനു പകരം രണ്ടു ലഘു ആകുമ്പോൾ കിട്ടുന്ന വൃത്തമാണ് ദിവ്യ.

വൃത്തം: ദിവ്യ (സയയം യ ചേർന്നാലതാകുന്നു ദിവ്യ)

കലമ്പിക്കറുക്കും!

രവിക്കെൻ വസന്തം തളർത്താൻ പുളിക്കും
മഴയ്ക്കെന്നിലെത്തീ കെടുത്താൻ കടുക്കും
ശരത്തെന്റെ പത്രം പൊഴിക്കാനറയ്ക്കും,
ശരിക്കന്നൃതുക്കൾ കലമ്പിക്കറുക്കും!

വൃത്തം: ഭുജംഗപ്രയാതം

ഋതുക്കൾ

പത്രപ്രവർത്തകയും കവിയുമായ അഞ്ജന ശശിയുടെ ഒരു കവിതയെ ആർദ്രഭാവമെല്ലാം കളഞ്ഞ്, മുദ്രാവാക്യം വിളി പോലെ, ഭുജംഗപ്രയാതം വൃത്തത്തിൽ മാറ്റി എഴുതിയതാണ് ഈ പോസ്റ്റ്. ഇത് പരിഭാഷയല്ല, പാരഡി മാത്രമാണ്.

അഞ്ജനയുടെ കവിത

ഒരു സൂര്യനും തളർത്താനാവില്ല
എന്നിലെ വസന്തത്തിനെ!
ഒരു മഴയ്ക്കും കെടുത്താനാവില്ല
എന്നിലെ അഗ്നിയെ!
ഒരു ശരത് കാലത്തിനും പൊഴിക്കാനാവില്ല
എന്നിലെ ഇലകളെ!
എന്റെ ഉന്മാദത്തിൻമേൽ
ശിശിരത്തിന്റെ മഞ്ഞുപുതപ്പിട്ട്
എന്റെ ചിന്തകളിൽ
ഗ്രീഷ്മത്തിന്റെ തെളിവെയില്‍ നിറച്ച്
എന്റെ ആലസ്യങ്ങളെ
ഹേമന്തത്തിലെ നിലാവിലാഴ്ത്തി
ഞാൻ ഇനിയും ഒഴുകും
ഒഴുകിക്കൊണ്ടേയിരിക്കും...

എന്റെ പാരഡി

രവിക്കെൻ വസന്തം തളർത്താൻ പുളിക്കും
മഴയ്ക്കെന്നിലെത്തീ കെടുത്താൻ കടുക്കും
ശരത്തെന്റെ പത്രം പൊഴിക്കാനറയ്ക്കും,
ശരിക്കന്നൃതുക്കൾ കലമ്പിക്കറുക്കും!

തുഷാരപ്പുതപ്പാൽ പിരാന്തും മറച്ചും
വിചാരങ്ങളിൽ ഗ്രീഷ്മതാപം നിറച്ചും
മടുക്കുന്നയാലസ്യമെല്ലാം പൊഴിച്ചും
തുടങ്ങും നിലയ്ക്കാത്തൊഴുക്കും, തനിച്ചും!

(വൃത്തം: ഭുജംഗപ്രയാതം. യകാരങ്ങൾ നാലോ ഭുജംഗപ്രയാതം)