Bye Microsoft (Again)

Twenty years.

Long enough to measure life in product cycles and org charts.

Last week, I closed a chapter at Microsoft that shaped not just my career, but who I am.

I joined as an engineer who was mostly curious and overconfident. I leave having had the privilege to build, break, fix, ship, and repeat across multiple waves of technology, often a few years before they were cool. “10-foot UI” before we were casually controlling apps from our couches. Online Office before Office Online had a name people recognized. Azure ML before AI and ML became dinner table conversations.

I’ve worked on things that quietly powered other people’s breakthroughs. I had a front row seat to cloud becoming real, AI becoming practical, and “data” becoming everyone’s favorite word.

But what I’ll remember most isn’t the launches.

It’s the people.

The hallway debates that were equal parts stubbornness and respect. The managers who pushed me harder than I thought I wanted. The teams who trusted me to lead when the path wasn’t obvious.

I had the privilege of working with brilliant engineers, thoughtful PMs, relentless sellers, and leaders who genuinely cared about impact. Together, we built products that serve customers around the world.

Twenty years is a long time. It also felt like the right time.

Microsoft gave me room to grow from an individual contributor to leading teams. It gave me mentors and lifelong friends. It gave me stories. The kind you laugh about later. The kind you survive first.

Leaving wasn’t easy. When you spend two decades somewhere, it becomes part of your identity. But growth has a way of asking new questions. I’m glad I said yes to them.

To everyone I’ve worked with, thank you. For the trust. For the arguments. For the shared wins. For the occasional chaos that somehow turned into momentum.

I’m proud of what we built. Even more proud of the people I built it with.

Onward.

See Also:

• മൈക്രോസോഫ്റ്റില്‍ ഏഴു വര്‍ഷം
• ഗുഡ് ബൈ, മൈക്രോസോഫ്റ്റ്

സന്തോഷ് നായർ

സീയാറ്റിലിലെ സാമൂഹികരംഗത്തെ സജീവ സാന്നിദ്ധ്യമായിരുന്ന സന്തോഷ് നായരുടെ അകാലദേഹവിയോഗവാർത്ത ഗാഢമായ ദുഃഖത്തോടെയാണ് കേൾക്കേണ്ടിവന്നത്.

2007-ലോ മറ്റോ ആണ്. സീയാറ്റിലിൽ കേരള അസ്സോസിയേഷൻ സംഘടിപ്പിച്ച ഒരു പരിപാടി നടക്കുന്നു. പ്രോഗ്രാമിന്റെ ഇടവേളയിൽ സ്ഥലത്തെ ഒരു പ്രധാനമലയാളി സ്റ്റേജിൽ നിന്നും സംസാരിക്കുകയാണ്. അപ്പോഴാണ് അധികം ഒച്ചയിലല്ലാതെ എന്നാൽ കേൾക്കേണ്ടവർ കേൾക്കുമാറ് സദസ്സിൽ നിന്നും ഒരു വിരുദ്ധ സ്വരം ശ്രദ്ധിച്ചത്. ഇത് പതിവുള്ളതല്ല. അല്പം കഴിഞ്ഞ് അടുത്തു ചെന്ന് പരിചയപ്പെട്ടു. പോർട്ട്ലാന്റിൽ നിന്നും സീയാറ്റിലിലേയ്ക്ക് വന്നിട്ട് അധികനാളായിട്ടില്ലാത്ത മനുഷ്യൻ. സന്തോഷ് നായർ. ഈ വിരുദ്ധ സ്വരം പിന്നീട് പലപ്പോഴും അസ്സോസിയേഷന്റെ സ്വരമായിമാറിയത് ചരിത്രം.

നമ്മളിൽ പലർക്കും അദ്ദേഹം ഒരു സുഹൃത്ത് മാത്രമല്ലായിരുന്നു. കൂട്ടായ്മകളും സ്നേഹസമ്പർക്കങ്ങളും തുടങ്ങിവയ്ക്കുന്ന, പരിചിതർക്കും അപരിചിതർക്കും തുണയാവുന്ന, കലാകാരന്മാർക്കും കലാരസികർക്കും സ്വന്തം വീട്ടുവാതിൽ തുറന്നിടുന്ന, മനോഹരമായി പ്രസംഗിക്കുന്ന, സുസ്മേരവദനനായ, എല്ലാവരുടേയും സന്തോഷ് ചേട്ടൻ ആയിരുന്നു.

കേരള അസ്സോസിയേഷനിൽ, എന്റെ ഓർമ്മ ശരിയാണെങ്കിൽ, സന്തോഷ് നായർ മൂന്നു തവണയെങ്കിലും പ്രസിഡന്റ് പദവിവിയിലുണ്ടായിരുന്നു. അതിൽ രണ്ടുതവണ അദ്ദേഹത്തോടൊപ്പം സെക്രട്ടറിയായി പ്രവർത്തിക്കാൻ എനിക്ക് അവസരം ലഭിച്ചു. അഭിപ്രായവ്യത്യാസങ്ങളും തർക്കങ്ങളും നിറഞ്ഞ സന്ദർഭങ്ങളിൽ, മറ്റുള്ളവരെ ശ്രദ്ധാപൂർവ്വം കേൾക്കുക എന്ന അപൂർവ്വ ഗുണം അദ്ദേഹം പ്രകടിപ്പിച്ചു. വിയോജിപ്പുകൾക്ക് പിന്നിലുള്ള പൊതുതാല്പര്യത്തിൽ സന്തോഷ് നായർ പ്രതീക്ഷ പുലർത്തി. സൗമ്യമായ വിവേകത്തോടെ എല്ലാവരെയും ഒരുമിപ്പിക്കാനുള്ള സന്തോഷ് നായരുടെ മിടുക്ക് അടുത്തറിയാൻ എനിക്ക് പലപ്രാവശ്യം അവസരം ലഭിച്ചു. പലവട്ടം മുമ്പും പറഞ്ഞിട്ടുള്ള വാചകം: "എടോ, ഇത്തവണ നമുക്ക് ശരിയാക്കണം!" എന്ന അർത്ഥത്തിലുള്ളതായിരുന്നു അവസാനമായി കണ്ടപ്പോഴും എന്നോട് പറഞ്ഞവാക്കുകൾ.

സീയാറ്റിലിലെ കലാകാരന്മാരോടും സാംസ്കാരിക മുന്നേറ്റങ്ങളോടും അദ്ദേഹത്തിനുണ്ടായിരുന്ന സ്നേഹം എടുത്തുപറയേണ്ടതാണ്. സന്തോഷ് നായരുടെ നേതൃത്വപാടവം കൊണ്ട് മാത്രം വിജയിച്ച നിരവധി പരിപാടികളും കൂട്ടായ്മകളും വിരലിൽ എണ്ണാവുന്നവയല്ല.

സന്തോഷ് നായരുടെ വിടവാങ്ങൽ സൃഷ്ടിച്ച ശൂന്യത വാക്കുകൾക്ക് അതീതമാണ്. അദ്ദേഹം ബാക്കിവച്ചുപോയ വലിയ ശൂന്യത സീയാറ്റിലിലെ മലയാളി സമൂഹം ഇന്ന് തിരിച്ചറിയുന്നു. പൊതുവായ ലക്ഷ്യങ്ങൾക്കായി ഒന്നിക്കാനും സർഗ്ഗാത്മകതയെ പ്രോത്സാഹിപ്പിക്കാനും അദ്ദേഹം നൽകിയ മാതൃക പിന്തുടരുന്നതാകും അദ്ദേഹത്തിന് നൽകാവുന്ന ഏറ്റവും വലിയ ആദരം. സന്തോഷ് നായരുടെ സാന്നിദ്ധ്യം കൊണ്ട് സീയാറ്റിൽ ധന്യമായിരുന്നു; അദ്ദേഹത്തെ അടുത്തറിയാൻ കഴിഞ്ഞതുകൊണ്ട് നമ്മളും.

ലതയ്ക്കും കുട്ടികൾക്കും ഈ വേർപാട് താങ്ങാനുള്ള കരുത്ത് ഉണ്ടാകട്ടെ.

ഈയർ ഇൻ റിവ്യൂ 2025

(100-125 കൊല്ലം മുമ്പുള്ള മലയാളഭാഷയിലുള്ള പരീക്ഷണമാണ്. മാർത്താണ്ഡവർമ്മാ നോവൽ ആണ് ഉപോദ്ബലകകൃതി.)

2025 എന്റെ മുന്നിൽ സാദ്ധ്യമാക്കിയ ചേഷ്ടകൾകണ്ട്, "ആവൂ! എന്നാത്മാഗതങ്ങളെ വചനരൂപേണ എങ്ങനെ ഗ്രഹിപ്പിക്കാൻ!" എന്നു ശങ്കപ്പെട്ടു കഴിഞ്ഞിട്ട് നാലാഞ്ചുനാളായി.

അർത്ഥലാഭമോ സ്ഥാനലാഭമോ മോഹിക്കാതെ ശ്ലോകമെന്ന കാവ്യരീതിയോടുള്ള പ്രതിപത്തിയാൽ പോയാണ്ടിൽ പതിനാറ് ശ്ലോകങ്ങളെ രചിക്കുകയുണ്ടായി. ഇത്രയുമായിട്ടുകൂടി സാധുപ്രകൃതികളുടെ ശാർദ്ദൂലവിക്രീഡിതമെന്ന് ഈയുള്ളവൻ തന്നെ പലനാളായി പറഞ്ഞുധരിപ്പിച്ചിട്ടുള്ള ഇന്ദ്രവജ്രയിൽ വെറും മൂന്നുശ്ലോകങ്ങളാണ് ചമയ്ക്കാനായത്. സ്രഗ്വിണിവൃത്തത്തോട് വിശേഷാൽപ്രിയം തോന്നിയവകയിൽ പിന്നൊരു മൂന്നുശ്ലോകങ്ങൾ എഴുതിയ സ്ഥിതിയും വന്നു. ശൃംഗാരം ഒരുതരം ഭക്തിയായി വരികയാൽ സ്ത്രീപ്രണാമ രൂപേണ കാമക്രീഡയിൽ രണ്ടു ശ്ലോകങ്ങൾ എഴുതിതീർത്തതിന്റെ ശേഷം മത്തമയൂരം, ചമ്പകമാല, ഭുജംഗപ്രയാതം എന്നിവയിലും ആശയാദികളിൽ ഹാസ്യഭാവത്തെ കലർത്തി, എന്നാൽ ജന്യമായ അലക്ഷ്യത്തോടെ ഉപയോഗിക്കയാൽക്കൂടി വൃത്തങ്ങൾ പലവഴിയും അനുസരണഭാവം കാണിച്ചുനിന്നു. ഇന്നാളുകളിൽ അൽപമാത്രമായി ഉപയോഗിച്ചുവരുന്നതായി കാണപ്പെടുന്ന സമാനികവൃത്തം ഒരു ശ്ലോകത്തിനായി ഉപയോഗിക്കയും ചെയ്തു. നിയമപ്രകാരം കാട്ടേണ്ടുന്ന ചാപല്യങ്ങൾ മറക്കാതെ ഫലമുഖി, പരിമളം, നാരാചിക, കേരളി എന്നീ വൃത്തങ്ങളിൽ അല്പം പരുങ്ങലോടുകൂടിയും ബഹുമാനഭയപൂർവ്വവും ശ്ലോകങ്ങൾ എഴുതാൻ തരമായതും ഇക്കഴിഞ്ഞയാണ്ടാണ്. സൂക്ഷ്മനേത്രങ്ങൾക്ക് ഇക്കൃതികളൊന്നും അസഹ്യതയെ ഉണ്ടാക്കിയില്ല എന്നു പറയുവാൻ തീർച്ച പോരാ. "കല്ലും മെല്ലെയെണീറ്റു കാലിണപിടിച്ചമ്പോടു കുമ്പിട്ടിടും" വിധം സൌന്ദര്യസമൃദ്ധവും പ്രൌഢവിലാസവുമായ സംഗതികൾ വരുങ്കൊല്ലമാകാം.

വാർദ്ധക്യംകൊണ്ടോ നിദ്രയുടെ അഭാവത്താലുണ്ടാവുന്ന ഈർഷ്യമൂലമോ അതികോപിഷ്ഠനായിച്ചമഞ്ഞിരിക്കുമ്പോൾ ആ കോപത്തെ അമർത്തുന്ന പുഞ്ചിരിക്ക് അധീനമാവാൻ സാധുശീലരായ മക്കൾ വിസ്തരിച്ച വചനകൌശലങ്ങൾ ("Is it a big deal?", "It's not that deep!") ഏതവസരത്തിലും അസ്വസ്ഥതയകറ്റാൻ പ്രയോഗിക്കാമെന്ന് കണ്ട് ഞാനും പരമാഹ്ലാദചിത്തനായി.

മുൻവർഷങ്ങളിലെ വിവശത ത്യജിച്ചിട്ട് ഏണത്തേക്കണ്ട കേസരിയെപ്പോലെ മുന്നോട്ടു കുതിച്ച Sidewinders ക്രിക്കറ്റ് ക്ലബ് പ്ലേ-ഓഫിലേയ്ക്കുള്ള വാതിലിനെ നാലാവർത്തി തുറക്കുക ചെയ്തു. കളിയാൽ വന്നുപെടാവുന്ന ദേഹാസ്വാസ്ഥ്യം മുതലായ വിചാരങ്ങൾകൊണ്ടു വിഷണ്ണനായിരുന്നെങ്കിലും "വിജയം സഫലമായെങ്കിൽ ഭാഗ്യം!" എന്ന നോട്ടത്താൽ പങ്കെടുക്കയാൽ പോരിനു വീണ്ടും ബാല്യമുണ്ടെന്നത് ദൃഢപ്പെടുകയും ചെയ്തു. സോക്കർ, വോളി തുടങ്ങിയ കേളീമുറകൾ നാട്ടുകാർ അന്ധാളിക്കത്തക്കവിധത്തിലുള്ള കലുഷത്തോടെ മാത്രമേ വിചാരത്തിൽ വരുന്നുള്ളൂ.

ജോലിയാൽ വലിയ ആനന്ദോന്മാദമൊന്നും വന്നുഭവിച്ചില്ല. GitHub CoPilot, Vibe Coding, MCP എന്നതിൽ നിന്നൊക്കെ സുഖം സിദ്ധിക്കുന്നതിൽ ആശമുഴുത്തെങ്കിലും ചിലവ സൂചികൾ കൊണ്ട് ദേഹംമുഴുവൻ കുത്തിയാലുണ്ടാകുന്നതുപോലുള്ള വേദനയും മനഃക്ലേശവും നേടിത്തന്നു. അടുപ്പിൽ തീ എരിയെ അയൽവീട്ടിൽ പോയി തിരികൊളുത്താനെരക്കാൻ അധൈര്യം വരികയാൽ Cursor, Supermaven, Notion ആദിയായ സംഗതികളിൽ ബുദ്ധിയെ അധികമായി പ്രവർത്തിപ്പിക്കാൻ മുതിർന്നുമില്ല. മാർഗ്ഗം അടഞ്ഞുകാണപ്പെട്ട സന്നിഗ്ദ്ധാവസ്ഥകൾ വന്നുകൂടലുണ്ടായപ്പോൾ വിനീതനായി നിന്നതല്ലാതെ ശ്ലാഘനീയമായ ക്രിയ വല്ലതും ചെയ്തു എന്നഭാവത്തെ തീരെ പ്രദർശിപ്പിച്ചില്ല. "അടിയൻ ലച്ചിപ്പോം!" എന്നൊരു പ്രതിശബ്ദം മുഴക്കാനും വയ്യെന്ന സ്ഥിതിയായി. എന്നുവച്ച് കരിമേഘത്താൽ ആകാശം മൂടപ്പെട്ടിട്ട് ഉഡുക്കളുടെ വെളിച്ചംപോലുമില്ലാതെ ദിക്കെല്ലാം അന്ധകാരമയമായി എന്നു വ്യാഖ്യാനിച്ചു നടക്കുന്നത് ശരിയാകയില്ല. പരിധിയില്ലാത്ത അവധിയുള്ളത് ദീപയഷ്ടികളുടെ ശോഭയെ വെല്ലുന്ന തേജസ്സോടെ നല്ലതിൻമണ്ണം ഉപയോഗിച്ച്, യാത്രകൾ തുടങ്ങിയ കൃത്യങ്ങളെ പലവട്ടമായി ആചരിക്കയുണ്ടായത് അന്തരംഗത്തെ പ്രശോഭിപ്പിച്ചു.

ഫേയ്സ്ബുക്ക്, ഇൻസ്റ്റ എന്നിവിടങ്ങൾ പകർന്ന അറിവുകൾ വയസ്സിൽ പാതി താനറിയാതെ മാഞ്ഞുപോയതുപോലെ കാണായിവന്നു. ഇൻസ്റ്റയിൽ whynotscience_, fryrsqared, merriamwebster, physicsisfun_official എന്നിത്രാദികളും ഫേയ്സ്ബുക്കിൽ BBC Archive, Julie Nolke, The Rest Is Science, Author Jason K Pargin, Mini Philosophy, Would I Lie To You?, Pilot Debrief, Steve Mould എന്നും മറ്റുമുള്ള സംഗതികളും ഇഷ്ടവിനോദം പകരാൻ നിമിത്തങ്ങളായിത്തീർന്നു.

വരാനിരിക്കുന്നയാണ്ടിൽ ജീവിതം നാകലോകതുല്യമായി ഭവിക്കണമെന്നാണ് മോഹം! 😀

ഈയർ ഇൻ റിവ്യൂ 2024

Happy New Year, 2025!

വായിച്ച പുസ്തകങ്ങളുടെ കണക്കുകളോ കണ്ട സിനിമകളുടെ എണ്ണമോ ഇല്ലാത്ത റിവ്യൂ ആണ്. വായിച്ച പുസ്തകങ്ങളുടെ ലിസ്റ്റിടണം എന്നത് ആഗ്രഹമായി തുടരുന്നു. കണ്ട സിനിമകൾ അധികമില്ല; സിനിമ കാണാതെ എഴുതിയ നിരൂപണങ്ങൾ മാത്രം. ആടുജീവിതത്തിന്റെ നിരൂപണം മാർത്താണ്ഡവർമ്മ നോവലിലെ ചിലഭാഗങ്ങൾ അനുകരിച്ച് എഴുതിയെങ്കിലും ബഹുഭൂരിപക്ഷത്തിനും അത് മനസ്സിലായില്ല. കഠിനവ്യഥകളുടെ കരിങ്കാലം എന്നല്ലാതെ എന്തുപറയാൻ!

ചില നേട്ടങ്ങളും കോട്ടങ്ങളും:

• ഇന്ദ്രവജ്രയിൽ എട്ടും (Achar is not pickle എന്നതിന്റെ പരിഭാഷ ഉൾപ്പെടെ) ഭുജംഗപ്രയാതത്തിലും വിയോഗിനിയിലും രണ്ടുവീതവും ചമ്പകമാല, രഥോദ്ധത, കമനീയം, മന്ദാക്രാന്ത, ഉർവ്വശി, ശാർദ്ദൂലവിക്രീഡിതം, സ്രഗ്വിണി എന്നീ വൃത്തങ്ങളിൽ ഓരോന്നുമായി ആകെ 19 ശ്ലോകങ്ങൾ എഴുതി. ഒരു വർഷം ഏറ്റവും കൂടുതൽ ശ്ലോകങ്ങൾ എഴുതുന്നത് 2024-ൽ ആവണം.
• ഏപ്രിൽ മാസത്തിൽ അധികം എഴുത്തും വായനയും നടന്നില്ല.
• ഏഴു രാജ്യങ്ങളിലായി 50,000-ൽ അധികം മൈൽ (80,000+ കിലോമീറ്റർ) യാത്ര ചെയ്തു. ആദ്യമായി കണ്ണൂരിന്റെ പലഭാഗങ്ങളും കണ്ടു.
• പരമ്പരാഗതമായ സോഷ്യൽമീഡിയ പോസ്റ്റുകളേക്കാൾ "വൈറൽ" ആയത് ലിങ്ക്ഡ്ഇൻ ജോലി ഒഴിവ് പോസ്റ്റായിരുന്നു. മൂവായിരം പേർ ആ ജോലിക്ക് അപേക്ഷിച്ചിരുന്നു.
• ക്രിക്കറ്റ് ടീം അംഗവും സുഹൃത്തുമായിരുന്ന രക്ഷിത്തിന്റെ മരണം അപ്രതീക്ഷിതവും ആകസ്‌മികവുമായിരുന്നു.
• ചുള്ളിക്കാട്, ഇളയിടം എന്നിവർ പങ്കെടുത്ത പരിപാടി ആസ്വദിക്കുവാൻ അവസരം ലഭിച്ചു. പ്രമോദ് പയ്യന്നൂർ രംഗസൃഷ്ടിയും സംവിധാനവും നിർവ്വഹിച്ച മതിലുകൾക്കപ്പുറം എന്ന നാടകവും ആസ്വദിക്കാനായി.
• അടുത്ത ഓം ശാന്തി ഓശാനയ്ക്കു വേണ്ടിയുള്ള തിരച്ചിൽ 2024-ലും വിഫലമായി അവശേഷിച്ചു.
• ഒരു ഡാൻസ് പരിപാടിയുടെ ഭാഗമായി പാട്ടുകൾ തിരയുന്നതിനിടയിൽ "നെഞ്ചോരമല്ലേ പെണ്ണേ..." എന്ന പാട്ടുമൂലം മൂന്നുനാല് മലയാളം വാക്കുകൾ പഠിച്ചു.
• വീട്ടിൽ ഇലക്ട്രിക് കാറുകൾ മാത്രമായി. ഇലക്ട്രിക് കാറുകൾ മാത്രമായാൽ ഉണ്ടാവും എന്നു പറഞ്ഞുകേട്ട അസൌകര്യങ്ങളൊന്നും ഇതുവരെ ഉണ്ടായിട്ടില്ല.
• ഏതെങ്കിലും ഒരു വരി എഴുതിക്കൊടുത്താൽ അത് വൃത്തത്തിലാണോ (അഥവാ വൃത്തത്തിലാക്കാൻ എന്തുചെയ്യണം) എന്നു പറയുന്ന ഒരു പ്രോഗ്രാം എഴുതി. ഉദാഹരണത്തിന്, "നാടിൻ നന്മകനേ പൊന്മകനേ മുത്തായവനേ" എന്ന വരിയിൽ മൂന്ന് തിരുത്തലുകൾ വരുത്തിയാൽ അത് മദനാർത്ത എന്ന വൃത്തത്തിലാവും എന്ന് ഈ പ്രോഗ്രാം പറഞ്ഞുതരും. തിരുത്തലുകൾ ഏതൊക്കെയെന്നും പ്രോഗ്രാം പറയും. ഉടനേ താല്പര്യമുള്ളമുള്ളവർക്കായി പങ്കുവയ്ക്കാം.

ഈയർ ഇൻ റിവ്യൂ 2023

Happy New Year, 2024!

അമ്മയെ ഇല്ലാതാക്കിക്കൊണ്ടാണ് 2023 കടന്നുപോയത്. ഇഷ്ടങ്ങൾ പലതും സ്വന്തം രീതിയിൽ പരസഹായമില്ലാതെ നേടിയെടുത്തിരുന്ന രീതിയായിരുന്നു അമ്മയുടേത്. പ്രതിഛായ മെച്ചപ്പെടുത്തുവാൻ വേണ്ടി ആരേയും—അടുത്ത ബന്ധുക്കളായാൽക്കൂടി—പ്രീണിപ്പിക്കുന്ന സ്വഭാവക്കാരിയായിരുന്നില്ല. സ്വേച്ഛപ്രകാരമുള്ള മരണത്തിന് ക്യാൻസർ അനുവദിച്ചില്ല എന്നതാവും അമ്മയുടെ ദുഃഖം. കാൽനൂറ്റാണ്ടുകാലം മക്കളും മരുമക്കളും കൊച്ചുമക്കളും സന്ദർശകർ മാത്രമായിരുന്നു, അമ്മയ്ക്ക്. രണ്ടുപതിറ്റാണ്ടു നീണ്ട വൈധവ്യത്തിൽ മിക്കവാറും അയൽക്കാരും ബന്ധുക്കളും മാത്രമായിരുന്നു അമ്മയുടെ ദിനക്കുറിപ്പുകളിലെ ചാർത്തുവിഷയങ്ങൾ. പരാതികളും ദീനപ്പട്ടികകളും പോയിട്ട് കുഞ്ഞു മോഹങ്ങൾ പോലും പങ്കുവയ്ക്കുന്ന സ്വഭാവമായിരുന്നില്ല അമ്മയുടേത്. അതിനാൽത്തന്നെ, മരണസമയത്ത് മക്കളെല്ലാവരും അരികിലുണ്ടായിരുന്നെങ്കിലും അമ്മയുടേത് ആഗ്രഹപൂർത്തീകരണം വന്ന ജീവിതമായിരുന്നോ എന്ന് അറിയാൻ മാർഗ്ഗമുണ്ടായില്ല. "അധികം നരകിക്കാതെ പോയല്ലോ!" എന്ന ബന്ധുമിത്രാദികളുടെ സാന്ത്വനവാക്കുകളോട് യോജിക്കുമ്പോഴും everyone dies alone എന്നാലോചിക്കുമ്പോൾ അമ്മയുടെ മരണനാളിൽ നനയാത്ത കണ്ണുകൾ ഇപ്പോൾ സജലങ്ങളാകുന്നു.

മകൻ കോളജിൽ ചേർന്നു. "I am so happy to get out of this house" എന്നതും "Glad to be back home" എന്നതും സൃയവസഹജമായ ഭാവപ്രകടനസഞ്ചയത്തിൽ കാണപ്പെടുന്നതിനാൽ അച്ഛനമ്മമാര്‍ എന്ന നിലയിൽ വിജയമാണോ പരാജയമാണോ എന്ന് തീരുമാനിക്കാൻ 2023 ഉപയോഗിക്കുന്നില്ല എന്നു വയ്ക്കുന്നു.

മറ്റുചില നേട്ടങ്ങളും കോട്ടങ്ങളും:

• ജോലിയിൽ തിരക്ക് കൂടിയതോടെ ഓൺലൈൻ ഇടപെടലുകൾ ഒന്നുരണ്ടു വരികളിലോ ഫോട്ടോകളിലോ മാത്രമായി ഒതുങ്ങി. ആവേശപ്രേരണയാലുള്ള പോസ്റ്റുകൾ ഇല്ലാതായി.
• പ്രായമേറുന്തോറും സഹിഷ്ണുത കുറയുന്നു എന്ന് തിരിച്ചറിയുന്നു. പക്ഷേ അസഹിഷ്ണുത വ്യക്തമായി പ്രകടിപ്പിക്കുന്ന സ്വഭാവം മുമ്പത്തേക്കാൾ കുറച്ചു എന്നാണ് വിലയിരുത്തൽ.
• ക്രിക്കറ്റുകളി കാര്യമായി കുറഞ്ഞു. ഗോൾഫ്, വോളിബോൾ എന്നിവ നിന്നുപോയി.
• ജീവിതത്തിൽ ആദ്യമായി സ്കൂബാ ഡൈവ് ചെയ്തു. ഇനി ഒരിക്കലും കയാക്കിങ് ചെയ്യില്ല എന്ന് രണ്ടുമൂന്നു വർഷം മുമ്പ് തീരുമാനിച്ചപോലെ ഇനി ഒരിക്കലും സ്കൂബാ ഡൈവിങ്ങിന് ഇറങ്ങിപ്പുറപ്പെടില്ല എന്നും ശപഥം ചെയ്തു.
• അടുത്ത ഓം ശാന്തി ഓശാനയ്ക്കു വേണ്ടിയുള്ള തിരച്ചിൽ 2023-ലും വിഫലമായി അവശേഷിച്ചു.
• 2016-നു ശേഷം വീണ്ടും ഇലക്ട്രിക് കാർ ഉപയോഗിച്ചു തുടങ്ങി.
• കേകയും വസന്തതിലകവും എന്ന പേരിൽ ഞാൻ എഴുതിയ ലേഖനം "You might like this" എന്ന കുറിപ്പോടെ എനിക്കുതന്നെ WhatsApp-ൽ കിട്ടി.
• എന്റെ പേരിൽ ഉണ്ടായ ഫേക്ക് Facebook പ്രൊഫൈൽ ആരോടും പണം ചോദിച്ചില്ല. അയാളുടെ ഈയർ ഇൻ റിവ്യൂ ഒന്നു വായിച്ചുനോക്കണമെന്നുണ്ട്.

ഈയർ ഇൻ റിവ്യൂ 2022

വിശദമായ ഈയർ ഇൻ റിവ്യൂ എഴുതണം എന്നു കരുതിയെങ്കിലും സാധിച്ചില്ല.

50 വയസ്സ് എത്തിയത് കുടുംബവും കൂട്ടുകാരും ചേർന്ന് കാര്യമായി ആഘോഷിച്ചു. ദിവ്യയുടേയും അടുത്തകൂട്ടുകാരുടേയും സമയവും പ്രയത്നവും ഏറെ ചെലവായവയായിരുന്നു മിക്ക ആഘോഷങ്ങളും. എല്ലാവരുടേയും സ്നേഹവായ്പ്പിന് വീണ്ടും നന്ദി. എഴുതാൻ തുടങ്ങിയാൽ ഇതുതന്നെയുണ്ട് കുറേ.

വർഷം പകുതിയോടെ ജോലി മാറി. AI-യെ പൂർണ്ണമായും ഉപേക്ഷില്ലെങ്കിലും ശല്യം കാര്യമായി കുറച്ചതോടേ ഡോക്ടറെകാണിക്കണോ എന്നുകരുതിയ തലവേദന പാതി കുറഞ്ഞുകിട്ടി. ജീവിതത്തിൽ AI-യുടെ പ്രയോഗം കൂടി.

പാൻഡമിക്കിൽ നിന്നും പതിയെ പുറത്തുവന്നു ജീവിതം സാധാരണമായിത്തുടങ്ങി. മാസ്ക് ഉപയോഗിക്കാതെയുള്ള യാത്രകൾ വീണ്ടും സാധ്യമായി.

മാതൃഭൂമി ആഴ്ചപ്പതിപ്പിൽ വെബിനിവേശം പംക്തിയിൽ ഞാൻ തയ്യാറാക്കിയ ശ്ലോകം സ്റ്റാർട്ടറിനെപ്പറ്റി ഒരു കുറിപ്പ് പ്രസിദ്ധീകരിച്ചു വന്നു. വിക്കിപ്പീഡിയയിൽ ഉദാഹരണങ്ങൾ ഒന്നുമില്ലാത്ത ചില വൃത്തങ്ങളിൽ ശ്ലോകങ്ങൾ എഴുതി.

എന്നാൽ, 2021-നേക്കാൾ വായനയും എഴുത്തും കുറഞ്ഞ വർഷമായി 2022. ഗോൾഫ് കളി കുറഞ്ഞു, എന്നുമാത്രമല്ല, വ്യായാമവും ആരോഗ്യപരിപാലനവും കുറഞ്ഞു എന്നുതന്നെ പറയാം. ഒരു ആവശ്യവുമില്ലാതെ ചില സിനിമകൾ കണ്ടു എങ്കിലും കണ്ട സിനിമകളെപ്പറ്റി ഒന്നും എഴുതിയില്ല (എഡിറ്റിങ് പഠിക്കാൻ സമയം കിട്ടിയില്ല).

2023-ൽ 2022-ലെ എല്ലാ നിരാശകളും തരണം ചെയ്യണം എന്നാണ് ആഗ്രഹം.

ഹാർട്ട് റേറ്റ്

(My primary care physician is a 75 year old Caucasian. His sense of humor is unbelievable.)

ഡോക്ടർ: വ്യായാമം ചെയ്യാറുണ്ടോ? അതോ ഇപ്പോഴും ക്രിക്കറ്റ്‌ കളി മാത്രമേയുള്ളോ?
ഞാൻ: സ്ഥിരമായി നടക്കാറുണ്ട്.
ഡോക്ടർ: ഭാര്യയും പട്ടിയുമായിട്ടാണോ?
ഞാൻ: അതേ!
ഡോക്ടർ: What’s the average heart rate?
ഞാൻ: ഏകദേശം 100 BPM
ഡോക്ടർ: Can you ask your wife to pick up the pace? It is useless if you spend those 45 min and do not get 140 BPM out of it.
ഞാൻ: പക്ഷേ പട്ടിയാണ് നടത്തം സ്ലോ ആക്കുന്നത്. 
ഡോക്ടർ: Once she picks up the pace, you and the dog will have no choice.

വാളെടുത്തവൻ വാളാൽ

പതിവുള്ള വാർഷിക മെഡിക്കൽ ചെക്കപ്പ്. ആരോഗ്യ സംബന്ധിയായ പല കാര്യങ്ങളും സംസാരിക്കവേ,

ഡോക്ടർ: I punched in the numbers from your bloodwork and your family history of heart diseases into an app. You look fine.
ഞാൻ: എന്നു വച്ചാൽ?
ഡോക്ടർ: You have a 4% chance of heart attack. We won't even bother unless it is 5% or more.
ഞാൻ: 5%-നു മുകളിലായാൽ എന്താണ് ചെയ്യുക?
ഡോക്ടർ: There is a procedure to find calcium deposits which reliably predicts clogging your arteries well in advance. Unless the model comes back with 10% or more, I can't prescribe that test to be covered by insurance.
ഞാൻ: Model?
ഡോക്ടർ: It is an app that uses AI. Are you into those?
ഞാൻ: ഏയ്, അല്ല. പക്ഷേ ആ ടെസ്റ്റ് കയ്യിൽ നിന്നും കാശുമുടക്കി ചെയ്യാമല്ലോ, അല്ലേ?
ഡോക്ടർ: Why would you do that? AI is so advanced these days. You got to trust the model.
ഞാൻ: ഒരു പ്രിസ്ക്രിപ്ഷൻ തന്നേക്ക്. ഒരു ബലത്തിന്...

ഈയർ ഇൻ റിവ്യൂ 2021

കഴിഞ്ഞ മൂന്നു വർഷമായി തുടരുന്ന പതിവ് വേണ്ടെന്ന് വയ്ക്കുന്നു. ഇത്തവണ വിശദമായ ഈയർ ഇൻ റിവ്യൂ എഴുതുന്നില്ല.

പോസിറ്റീവുകൾ:

• 2020-നേക്കാൾ കൂടുതൽ വായിക്കുകയും എഴുതുകയും ചെയ്തു
• കൂടുതൽ യാത്രകൾ സാദ്ധ്യമായി
• ക്രിക്കറ്റും വോളീബോളും ഏകദേശം പഴയ പടിയിലേയ്ക്ക് വന്നു
• ഒരുപാട് സിനിമകൾ കണ്ടു. ഓം ശാന്തി ഓശാനയോളം വരില്ല, ഒന്നും!

നിരാശകൾ:

• ഫോട്ടോ എടുപ്പ് കാര്യമായി കുറഞ്ഞു.
• ഓഫീസിൽ ഈ വർഷം മൂന്ന് ബോസ് ആയി.
• ഒരുപാട് സിനിമകൾ കണ്ടു. ഓം ശാന്തി ഓശാനയോളം വരില്ല, ഒന്നും!

2022 പ്രതീക്ഷയാണ്.

കാന്ത!

എല്ലാ വർഷവുമുള്ള ആചാരം ഈ വർഷവും!

മഴക്കോളിന്നഴകുനിറയും പ്രിയ പ്രണയേശ്വരീ
മിഴിക്കോണാൽ പ്രണയകഥനം കുറിക്ക സുമോഹിനീ,
പഴന്തേനാം ഹൃദയപുളകം തരാം സഖി; മുന്തിരി-
പ്പഴച്ചാറിൻ മധുവിനുസമം മനോഹര ജീവിതം!

(ഈ ശ്ലോകം കാന്ത എന്ന വൃത്തത്തിലാണ്. മുമ്പ് ആരെങ്കിലും ഈ വൃത്തത്തിൽ ശ്ലോകം എഴുതിയിട്ടുണ്ടോ എന്നറിയില്ല. ഞാൻ കണ്ടിട്ടില്ല. അവസാന വരി മുറിയുമ്പോലെ ആണ് ചൊല്ലേണ്ടത് എന്നു തോന്നുന്നു. യഭം കാന്താ നരസലഘുവും ഗ നാലിനു പത്തിനും എന്നാണ് കാന്തയുടെ ലക്ഷണം.)

ഈയർ ഇൻ റിവ്യൂ 2020

2020-ലെ പോസ്റ്റിറ്റീവുകൾ കൂടുതൽ പറയാം.

ജോലിസംബന്ധമായി പ്രതീക്ഷിക്കാത്തതായ നേട്ടങ്ങൾ ഉണ്ടായി ("കപടലോകത്തുനിന്നും" എന്നൊരു പോസ്റ്റ് മുമ്പ് ഇട്ടത് അർത്ഥവത്തായി). പുതിയ ടീമിൽ ചേർന്നു. ഇത്രകാലം ശ്രമിച്ചിട്ടില്ലാത്ത മേഖലകളിൽ കൈവച്ചു ശരാശരിക്കുമേൽ തൃപ്‌തികരമായി അവ ചെയ്തുകൂട്ടി (I consider this as steady progress, കഴിഞ്ഞ വർഷവും ഇതേ വാചകം എഴുതിയിരുന്നു). യാത്രകൾ കുറഞ്ഞു എന്നു പറയേണ്ടതില്ലല്ലോ. AI കൂടുതൽ രംഗങ്ങളിലേയ്ക്ക് വ്യാപിക്കുന്നത് പ്രതീക്ഷയോടെ കാണുന്നു.

ഒരു മാസം ഒരു പുസ്തകം എന്ന ലക്ഷ്യം നടക്കാൻ വേണ്ടി ഒരു പുസ്തക ക്ലബിൽ ചേർന്നു. തുടങ്ങിയത് താമസിച്ചു. എന്നാലും പ്രതീക്ഷയുണ്ട്. രണ്ടുമൂന്നു പുസ്തകങ്ങളും കുറച്ചു കഥകളും വായിച്ചു. ഒരു പുസ്തക ആസ്വാദനം എഴുതിത്തുടങ്ങിയിട്ട് എട്ടു മാസമായി. ഇനി പോസ്റ്റ് ചെയ്തില്ലെന്നും വരും.

കഴിഞ്ഞ അഞ്ചാറു വർഷം കണ്ടത്രയും സിനിമകൾ ഈ വർഷം കണ്ടു കൂട്ടി. മലയാളത്തിൽത്തന്നെ ഒറ്റാൾ, ഹെലൻ, അഞ്ചാം പാതിര, അയ്യപ്പനും കോശിയും, കപ്പേള എന്നു വേണ്ട കുറേ കണ്ടു. The Aeronauts, Parasite, Knives Out അങ്ങനെ ചില ഇംഗ്ലീഷും. പിന്നെ Money Heist തുടങ്ങിയ ചില സീരീസുകളും കണ്ടു. ചുരുക്കത്തിൽ മറ്റൊരു 2020 താങ്ങാൻ കെൽപ്പില്ല.

2020-ൽ ഏറ്റവും സന്തോഷം തന്നത് ലോക്ഡൌൺ കാലത്ത് ചെയ്ത ഷോർട്ട് ഫിലിമുകളാണ്. അവ നല്കിയ ആശ്വാസം ചില്ലറയല്ല. പങ്കെടുത്തവർക്കെല്ലാം ഒറ്റപ്പെടലിൽ നിന്നുള്ള മോചനമായിരുന്നു എന്നു തോന്നുന്നു. കുറേപ്പേർ നല്ലതു പറഞ്ഞു.

2020-ൽ ആയിരിക്കണം ഞാൻ ഏറ്റവും കൂടുതൽ ശ്ലോകങ്ങൾ എഴുതിയത്. ഏകദേശം ഇരുപതോളം. പുതിയ വൃത്തങ്ങളും പരീക്ഷിച്ചു. ഉമേഷ് അമരുകശതകം പരിഭാഷ ചെയ്തുകൊണ്ടിരുന്നപ്പോൾ അതിൽ ചില ശ്ലോകങ്ങൾക്ക് ഇന്ദ്രവജ്രയിൽ പാരഡി എഴുതി.

സോക്കർ, ക്രിക്കറ്റ്, വോളീബോൾ കളികളെല്ലാം നിന്നു. അതിനാൽ വിജയാപജയ പാർട്ടികളും പ്രസംഗങ്ങളും ഇല്ലായിരുന്നു.

തൂവാനത്തുമ്പികൾ "റിവ്യൂ" വർഷാവസാനം വീണ്ടും വായിക്കപ്പെട്ടു. ഓം ശാന്തി ഓശാനയോളം വരില്ല ഒന്നും!

"ശാസ്ത്രബോധത്തിനും മനുഷ്യത്വത്തിനും എതിരായി നിൽക്കുന്നവരുടേതു കൂടിയാണ് ലോകമെങ്കിലും സ്വന്തം മക്കളെയെങ്കിലും ആ വഴിക്കു വിടാതിരിക്കാനുള്ള വകതിരിവ് കാണിക്കണമെന്ന് 2019 ഓർമ്മപ്പെടുത്തിക്കൊണ്ടേയിരുന്നു." ഇത് ഒരു വർഷം മുമ്പ് എഴുതിയതാണ്. വാക്സിന് എതിരേ ഘോരഘോരം പ്രസംഗിച്ച ഒരു FB ഫ്രണ്ട് ഉണ്ടായിരുന്നു (അധികം ആയിട്ടില്ല, ഫേയ്സ്ബുക്ക് timeline തപ്പിയാൽ കിട്ടും. ഇപ്പോൾ വാക്സിൻ വിതരണത്തിനു കാത്തു നിലക്കുന്നു. അത് കിട്ടിയിട്ടു വേണം പാർട്ടികൾക്ക് പോകാനും വാക്സിന് എതിരേയുള്ള പ്രസംഗം തുടരാനും).

2021 പ്രതീക്ഷയാണ്. സയൻസ് വിജയിക്കുന്ന കാലം. Happy New Year!

കൊറോണക്കാലത്ത് നാടൻ ചിക്കൻ ഉലർത്തിയത് മൻഹാട്ടനോടൊപ്പം

അധികം പാചകം ചെയ്തു ശീലമില്ലാത്തവർക്കു വേണ്ടിയുള്ള പാചകവിധിയാണ് ഇന്നത്തെ അടുക്കളക്കാഴ്ചയിൽ. എസ്റ്റാബ്ലിഷ്‌ഡ് ദേഹണ്ഡക്കാർക്ക് പാചകവിധി ഒന്നോടിച്ചുനോക്കി തുടങ്ങാവുന്നതരത്തിൽ ലളിതമായ വിഭവമാണ് നാടൻ ചിക്കൻ ഉലർത്തിയത്.

നാടൻചിക്കൻ കൊറോണയില്ലാത്ത കാലത്തും ഉലർത്താമെങ്കിലും (ഉലർത്തുക = ഡ്രൈ ആക്കുക) അനക്ഡോട്ടൽ എവിഡൻസ് പ്രകാരം സ്റ്റേ-ഇൻ ഓർഡറുകൾ അനുസരിക്കാൻ അപാകുക്കൾക്കാണ് (അങ്ങനെ ഒരു വാക്കുണ്ടോ?) കൂടുതൽ പ്രയാസം. അതിനാൽ നാളിന്നേവരെ അടുക്കള കണ്ടിട്ടില്ലാത്തവരും ചായ, ചമ്മന്തി എന്നിവയിൽ പാചകമൊതുക്കിയവരും മുന്നോട്ടു കടന്നുവരൂ, ഈ പാചകവിധി പരീക്ഷിക്കൂ! പാചകം എന്നാൽ കൈപ്പുണ്യമാണെന്ന് ധരിച്ചും ധരിപ്പിച്ചും കഴിയുന്നവർക്ക് അങ്ങനെയല്ല എന്ന് തെളിയിക്കാനുള്ള അവസരം കൂടിയാണിത്.

Tip: ചായയുടെ പാചകക്രമം ശ്ലോകത്തിൽ വേണമെന്നുള്ളവർ ഹരിദാസ്‌ മംഗലപ്പള്ളിയേയോ (സ്രഗ്ദ്ധര) എന്നെയോ (കുസുമമഞ്ജരി) സമീപിക്കുക.

ചിക്കൻ ഉലർത്തിയത് ഉണ്ടാക്കാൻ ആവശ്യമായ സാധനങ്ങൾ:

തൊലികളഞ്ഞ്, എല്ലോടുകൂടിയ കോഴിക്കഷണങ്ങൾ 1.5 x 1.5 x 1.5 ഇഞ്ച് വലിപ്പത്തിൽ മുറിച്ചത്: ഒരു കിലോ

Tip: ആദ്യമായി പാചകം ചെയ്യുമ്പോൾ കുറഞ്ഞ അളവാണ് ഉത്തമം. എന്നാലും കോൺഫിഡൻസ് ഉണ്ടെങ്കിൽ വലിയ അളവ് പരീക്ഷിക്കുന്നതിൽ തെറ്റില്ല.
FAQ: എല്ലില്ലെങ്കിൽ കുഴപ്പമുണ്ടോ?
ഉത്തരം: കോഴിക്ക് എല്ലില്ലെങ്കിലും കുഴപ്പമില്ല.

സാമാന്യം വലിപ്പമുള്ള സവാള ചെറുതായി നേടുകേ അരിഞ്ഞത്: 2 എണ്ണം
ഇഞ്ചി തള്ളവിരലിന്റെ വലിപ്പമുള്ളത് ചെറുതായി അരിഞ്ഞത്: ഒരു കഷണം
വെളുത്തുള്ളി തൊലി കളഞ്ഞ് ചെറുതായി അരിഞ്ഞത്: 1

Tip: ഇഞ്ചിയും വെളുത്തുള്ളിയും ഇല്ലെങ്കിൽ 2 ടേബിൾ സ്പൂൺ ജിഞ്ചർ ഗാർലിക് പേസ്റ്റ് ഇട്ടാൽ മതി. രുചിവ്യത്യാസമൊന്നും ആരും അറിയാൻ പോകുന്നില്ല.

പച്ചമുളക് നേടുകേ അരിഞ്ഞത്: 4 (ഇല്ലെങ്കിലും കുഴപ്പമില്ല, കുരുമുളക് ഇട്ട് അഡ്ജസ്റ്റ് ചെയ്യാം, പക്ഷേ പച്ചമുളക് കിടക്കുന്നതു കണ്ടാൽ കാണുന്നവർക്ക് ആനന്ദമാണ്.)
തക്കാളി വലിപ്പമുള്ളത് ചെറുതായി അരിഞ്ഞത്: 1

ബേർബൻ വിസ്കി: 60 മില്ലി (2 ഔൺസ്)
സ്വീറ്റ് വേർമൂത്: 15 മില്ലി (0.5 ഔൺസ്)
ആൻഗോസ്റ്റുര ബിറ്റേഴ്സ്: ആവശ്യത്തിന്
മരസ്കീനോ ചെറി: 1
ഓറഞ്ച് പീൽ: മരസ്കീനോ ചെറി കിട്ടിയില്ലെങ്കിൽ മാത്രം
2x2 ഇഞ്ച് വലിപ്പമുള്ള ട്രാൻസ്പേരന്റ് ഐസ് കഷണം: 1 (ഇത് പ്രധാനമായും ഇന്സ്റ്റഗ്രാമിൽ പടമിട്ട് ഷോ-ഓഫ് നടത്താനാണ്. ഇല്ലെങ്കിൽ ഫ്രിഡ്ജിൽ നിന്നും കിട്ടുന്ന ഐസ് രണ്ട് വലിയ കഷണം ആയാലും മതി)

മഞ്ഞൾപ്പൊടി: 1 ടീ സ്പൂൺ (മഞ്ഞൾപ്പൊടി അല്പം ഓവർറേറ്റഡ് പൊടിയാണ്. ഇട്ടില്ലെങ്കിലും രുചി വ്യത്യാസമുണ്ടാവില്ല എന്നു മാത്രമല്ല, കഴിക്കുന്നവർ അറിയുകയുമില്ല. മഞ്ഞൾ എല്ലാറ്റിനും ഉതകുന്ന ഒറ്റമൂലിയാണെന്ന് നാസയും കേശവൻ മാമനും പറഞ്ഞിട്ടുള്ളതിനാൽ അല്പം ഇടുന്നെന്നേയുള്ളൂ.)
എരിവു കുറഞ്ഞ (കാശ്മീരി) മുളകുപൊടി: 3 ടേബിൾ സ്പൂൺ

Tip: എരിവുള്ള മുളകുപൊടി കൂടുതൽ ഇട്ടാൽ വിവരം അറിയും.

മല്ലിപ്പൊടി: 2 ടേബിൾ സ്പൂൺ
കുരുമുളകു പൊടി: 1 ടേബിൾ സ്പൂൺ (ടച്ചിംഗ്‌സ് ആയി ഉപയോഗിക്കാനാണെങ്കിൽ അല്പം കൂടിയാലും കുഴപ്പമില്ല.)
ഗരം മസാല (എരിവ് അനുസരിച്ച്): 2 ടീ സ്പൂൺ
ഉപ്പ്: പാകത്തിന് (അല്ല പിന്നെ)

കറിവേപ്പില: 3 തണ്ട് (കുറഞ്ഞാലും സാരമില്ല.)
കടുക്: ഒരു പിടി (25 എണ്ണത്തോളം)
മല്ലിയില: ഐശ്വര്യത്തിന്
വെളിച്ചെണ്ണ: കൂടിയാലും കുറയരുത്

ഇത്രയും സാധനങ്ങൾ കയ്യിലില്ലെങ്കിൽ ഓൺലൈനിൽ വാങ്ങാൻ ശ്രമിക്കുക. ഓൺലൈനിൽ കിട്ടുന്നില്ലെങ്കിൽ അത്താഴത്തിന് വല്ല പുട്ടും പയറും ആവുന്നതാണ് ഭേദം.

ഡോ. പോൾ ഹീലി: 14 ദിവസം കൂടുമ്പോൾ ഒരിക്കൽ കടയിൽ പോയി അത്യാവശ്യ ഷോപ്പിംഗിന് നടത്തുന്നതാണ് അഭികാമ്യം. അല്ലാതെ എല്ലാ ദിവസവും ഷോപ്പിംഗ് എന്നു പറഞ്ഞ് ഇറങ്ങി നടക്കരുത്.

പാചകം ചെയ്യുന്ന വിധം:

മുറിച്ചെടുത്ത കോഴിക്കഷണങ്ങൾ മഞ്ഞൾപ്പൊടി, മുളകുപൊടി, മല്ലിപ്പൊടി, കുരുമുളകു പൊടി, ഗരം മസാല, ഉപ്പ് എന്നിവ ഒരു പൊടിയ്ക്ക് (30 മില്ലിയിൽ താഴെ) വെള്ളവും ചേർത്ത് പുരട്ടിയെടുത്ത് അരമണിക്കൂർ മാറ്റി വയ്ക്കുക. ഇഞ്ചിയും വെളുത്തുള്ളിയും ഇപ്പോൾ ചേർക്കരുത്. ഇനി പറഞ്ഞില്ല എന്നു വേണ്ട.

ഈ സമയം ഒരു മിക്സിംഗ് ഗ്ലാസിൽ ആദ്യം സ്വീറ്റ് വേർമൂത്, അതിനു ശേഷം ബേർബൻ വിസ്കി എന്നിവ ഒഴിച്ച് നന്നായി ഇളക്കുക. അതിനു ശേഷം വിസ്കി ഗ്ലാസിൽ ഐസ്ക്യൂബ് ഇട്ടശേഷം വേർമൂത്, ബേർബൻ വിസ്കി മിക്സ് അതിലേയ്ക്കു പകരുക. അഞ്ചുതുള്ളി ആൻഗോസ്റ്റുര ബിറ്റേഴ്സ് ഇതിലേയ്ക്കു തളിക്കുക. ഇതിനെ ചെറിയോ ഓറഞ്ചു പീലോ കൊണ്ട് അലങ്കരിക്കുക. ഫോട്ടോ എടുത്തശേഷം മെല്ലെ, ആസ്വദിച്ച് കുടിക്കുക. ഈ ദ്രാവകം മൻഹാട്ടൻ എന്നപേരിലാണ് ദേവാസുരൻമാർ നുകർന്നുകൊണ്ടിരുന്നത്. നമുക്കും ആ പേരിൽ തന്നെ കുടിക്കാം.

മുന്നറിയിപ്പ്: മദ്യം കുടിക്കാൻ പ്രേരിപ്പിക്കുന്നത് ശിക്ഷാർഹമല്ലെങ്കിലും അഭികാമ്യമല്ല. കുടിക്കുമ്പോൾ നാട്ടിലുള്ള എന്റെ കസിൻസ് ചെയ്യുന്നതുപോലെ ഒറ്റമോന്തിൽ ഒരു ഡ്രിങ്ക് തീർക്കരുത്.

മാരിനേറ്റ് ചെയ്ത കോഴി ഒരു പാത്രത്തിലിട്ട് ഒരു മൂടുപാത്രം വച്ച് പകുതി തീയിൽ ഏകദേശം മുപ്പത് മിനുട്ട് വേവിക്കുക. കോഴി വെന്തുകൊണ്ടിരിക്കുമ്പോൾ മിക്സിംഗ് ഗ്ലാസിൽ രണ്ടാമത്തെ ഡിങ്ക് ഫിക്സ് ചെയ്ത് വീണ്ടും ഫോട്ടോ എടുത്തശേഷം സാവധാനം കുടിച്ചാൽ പാത്രത്തിനടിയിൽ പിടിക്കുന്നുണ്ടോ എന്ന് പെട്ടെന്ന് മനസ്സിലാക്കാം.

രണ്ടാം ഡ്രിങ്കും കഴിയുമ്പോൾ കോഴി വെന്തുകഴിഞ്ഞെങ്കിൽ അടുപ്പിൽ നിന്നും വാങ്ങി മാറ്റി വയ്ക്കാം. ഇല്ലെങ്കിൽ അത് അവിടെയിരുന്ന് വേവട്ടെ.

ഇതേ സമയം മറ്റൊരു പാത്രത്തിൽ വെളിച്ചെണ്ണ ചൂടാക്കി കടുകു പൊട്ടിക്കുക. ഉള്ളി, കറിവേപ്പില, പച്ചമുളക്, അല്പം ഉപ്പ് (എരിവ് കൂടുതൽ വേണമെന്നുള്ളവർ അല്പം കുരുമുളക് പൊടി) എന്നിവ ചേർത്ത് ഉള്ളി തവിട്ടുനിറം ആകുന്നതു വരെ ചെറിയ ചൂടിൽ വഴറ്റിയെടുക്കുക. ഈ കലാപരിപാടി ശരിക്കു ചെയ്താൽ പത്തു പന്ത്രണ്ടു മിനിട്ടെടുക്കും.

ഇതിനിടയിൽ കോഴി വെന്തുകഴിഞ്ഞെങ്കിൽ തീ അണയ്ക്കാൻ മറക്കരുത്. ഒരു ഡ്രിങ്കു കൂടി വേണോ എന്ന് ഗാഢമായി ആലോചിക്കാനും ഈ സമയം വിനിയോഗിക്കാം.

വീണ്ടും ഉള്ളിയിലേയ്ക്ക്. സ്വർണ്ണവർണ്ണത്തോടടുത്ത ഉള്ളിക്കൂട്ടിൽ ഇഞ്ചിയും വെളുത്തുള്ളിയും ചേർത്ത് വീണ്ടും മൂന്നു മിനുട്ട് വഴറ്റുക.

അതും കഴിഞ്ഞ് അരിഞ്ഞു വച്ച തക്കാളി ഇതിലേയ്ക്കു ചേർക്കുക. തക്കാളി അലിഞ്ഞ് വെള്ളംപോലെ ആകുന്നതുവരെ വഴറ്റൽ തുടരുക.

ഉള്ളിക്കൂട്ടും കോഴിവെന്തതും കൂടി ഒരു പാത്രത്തിലാക്കി നന്നായി കലർത്തി കുറച്ചു കറിവേപ്പില കൂടി ചേർത്ത് മൂടിവച്ച് മൂന്നു മിനിട്ടോളം കൂടി വേവിക്കുക.

അതുകഴിഞ്ഞ് തീ കുറച്ച് മൂടി മാറ്റി ഡ്രൈ ആവുന്നതുവരെ വേവിക്കണം. ഒരുവിധം തവിട്ടു നിറമായാൽ നിർത്താം.
FAQ: തവിട്ടു നിറമായില്ലെങ്കിലോ?
ഉത്തരം: ഒരല്പം എണ്ണ കൂടി ഒഴിച്ച് ഇളക്കാം.

കറിവേപ്പില ഇനിയും ബാക്കിയുണ്ടെങ്കിൽ അതും മല്ലിയിലയും കൂടിയിട്ട് ഫുഡീ ആപ്പിലൊരു പടവുമെടുത്താൽ കോറോണക്കാലത്തെ ബോറടി മാറിക്കിട്ടുകയും ചെയ്യും കഴിക്കാൻ വല്ലതും ആവുകയും ചെയ്യും.

(ഫസ്റ്റ് ഡേ ഫുൾ ശരിയായി വരണമെന്നില്ല എന്ന് ഏട്ടൻ പറഞ്ഞിട്ടുള്ളത് ഓർക്കുമല്ലോ.)

ഈയർ ഇൻ റിവ്യൂ 2019

2019 സമ്മിശ്രാനുഭവങ്ങളുടെ വർഷമായിരുന്നു.

ജോലിസംബന്ധമായി പ്രതീക്ഷിച്ചതും പ്രതീക്ഷിക്കാത്തതുമായ കുറച്ചധികം നേട്ടങ്ങൾ ഉണ്ടായി. സെറ്റ്ബാക്കുകൾ ഉണ്ടായില്ല എന്നല്ല; പലതിനേയും അഭിമുഖീകരിക്കാനും തരണം ചെയ്യാനും സാധിച്ചു. ഇത്രകാലം ശ്രമിച്ചിട്ടില്ലാത്ത മേഖലകളിൽ കൈവച്ചു ശരാശരിക്കുമേൽ തൃപ്‌തികരമായി അവ ചെയ്തുകൂട്ടി. മൈക്രോസോഫ്റ്റിനെ പ്രതിനിധീകരിച്ച് ഒട്ടനവധി കോൺഫറൻസുകളിലും മറ്റും പങ്കെടുക്കാനും സംസാരിക്കാനും സഹായിക്കാനും അവസരമുണ്ടായി. ആർട്ടിഫിഷ്യൽ ഇന്റലിജൻസ് ഉപയോഗിക്കുന്ന ആദ്യത്തെ കവയിത്രി/കലാകാരിയായ ഓറിയകാത്തിയുടെ ഉപജ്ഞാതാക്കളോട് (സ്ലീബ, ഫാബിൻ) ഔദ്യോഗികനിലയിൽ സഹകരിക്കാൻ ഇടയായി.

എന്നാലും വ്യക്തിപരമായി പശ്ചാൽഗതിയായിരുന്നു. ഒരു മാസം ഒരു പുസ്തകം എന്ന ലക്ഷ്യം ഇത്തവണയും നടന്നില്ല. മൂന്നുനാലു പുസ്തകങ്ങൾ വായിച്ചു തുടങ്ങിയെങ്കിലും ഈ വർഷം ഒന്നും വായിച്ചു പൂർത്തിയാക്കിയില്ല. ജോലിത്തിരക്കും ജോലിസംബന്ധമായ യാത്രകളും കാരണമായി പറയാം. ഈ അവസ്ഥയ്ക്കു ഉടനേ മാറ്റമുണ്ടാവാൻ സാദ്ധ്യതകാണുന്നില്ല.

ലീസ, ജോജോ എന്നിവരുടെ നേതൃത്വത്തിൽ സീയാറ്റിലിൽ നടത്തിയ 'മുദ്രാംഗുലീയം' ഡാൻസ്-ഡ്രാമയിൽ വളരെചെറിയൊരളവിൽ പങ്കുകൊള്ളാൻ അവസരം കിട്ടിയത് നന്ദിയോടെ ഓർക്കുന്നു. സോക്കർ കളിച്ചില്ല. പതിവുപോലെ സോക്കർ പാർട്ടിയിൽ പോയെങ്കിലും പ്രസംഗിച്ചില്ല. ക്രിക്കറ്റ് കളിച്ചെങ്കിലും സംഭവം അവസാനിപ്പിക്കാൻ സമയമായി എന്ന തോന്നലാണ് ബാക്കി. വോളീബോൾ ഒന്നുകൂടി ഊർജ്ജിതമാക്കണം.

ഫേയ്സ്ബുക്കിൽ ഒരാഴ്ച ഒരു പടം പബ്ലിഷ് ചെയ്യണം എന്ന ഒരു മാരണത്തിൽ പെട്ടുപോയി. അത് അവസാന ആഴ്ചകളിൽ പലകാരണങ്ങളാൽ മുടങ്ങിക്കിടപ്പാണ്. പൊതുവേ ഫോട്ടോ എടുക്കാനുള്ള ഉത്സാഹം കുറഞ്ഞു.

തൂവാനത്തുമ്പികൾ ഈവർഷം ആദ്യം തന്നെ കണ്ടുതീർത്തു. അതിന്റെ "റിവ്യൂ"വിന് കിട്ടിയ പ്രതികരണം കൂടുതൽ പടങ്ങൾ കാണണമെന്ന മോഹമുദിപ്പിച്ചു. ആ ആവേശത്തിൽ നമുക്കു പാർക്കാൻ മുന്തിരിത്തോപ്പുകൾ കണ്ടുതുടങ്ങിയെങ്കിലും മുഴുമിപ്പിക്കാനായില്ല. ഉയരെ, ആൻഡ്രോയ്ഡ് കുഞ്ഞപ്പൻ, Marriage Story എന്നീ സിനിമകളേ ഈ വർഷം കാണാൻ പറ്റിയുള്ളൂ. മൂന്നും ഇഷ്ടപ്പെട്ടു. (റിവ്യൂ ഇടുന്നില്ല.) ആമസോൺ, നെറ്റ്ഫ്ലിക്സ് എന്നിവയിലൊക്കെയായി നൂറ്റിയമ്പത്തോളം പുതിയ മലയാള പടങ്ങൾ ഉണ്ടെന്ന് കേൾക്കുന്നു. കുമ്പളങ്ങി നൈറ്റ്സ്, വൈറസ്, പിന്നെ ആ പോത്തിനെപ്പറ്റിയുള്ള പടം എന്നിവയടക്കം ഒന്നും കണ്ടില്ല. ഓം ശാന്തി ഓശാനയെപ്പറ്റി (വീണ്ടും) രണ്ടുവാക്ക് നല്ലതു പറഞ്ഞതിന് തല്ലുകിട്ടിയില്ലെന്നേയുള്ളൂ.

(എഡിറ്റ്: ഉണ്ട, ലൂസിഫർ എന്നിവയും കാണേണ്ടി വന്നൂ, ഈ വർഷം. പെട്ടെന്ന് ഓർമ്മ വന്നില്ല.)

പട്ടകാലത്തിന്റെ സൂചനകൾ സുഹൃത്തുക്കളിലും പരിചയക്കാരിലും പ്രതിഫലിക്കുന്നു എന്നത് പ്രതീക്ഷയും നിരാശയും തരുന്നു. ശാസ്ത്രബോധത്തിനും മനുഷ്യത്വത്തിനും എതിരായി നിൽക്കുന്നവരുടേതു കൂടിയാണ് ലോകമെങ്കിലും സ്വന്തം മക്കളെയെങ്കിലും ആ വഴിക്കു വിടാതിരിക്കാനുള്ള വകതിരിവ് കാണിക്കണമെന്ന് 2019 ഓർമ്മപ്പെടുത്തിക്കൊണ്ടേയിരുന്നു.

2019 റിവ്യൂ

2019 സമ്മിശ്രാനുഭവങ്ങളുടെ വർഷമായിരുന്നു.

ജോലിസംബന്ധമായി പ്രതീക്ഷിച്ചതും പ്രതീക്ഷിക്കാത്തതുമായ കുറച്ചധികം നേട്ടങ്ങൾ ഉണ്ടായി. സെറ്റ്ബാക്കുകൾ ഉണ്ടായില്ല എന്നല്ല; പലതിനേയും അഭിമുഖീകരിക്കാനും തരണം ചെയ്യാനും സാധിച്ചു. ഇത്രകാലം ശ്രമിച്ചിട്ടില്ലാത്ത മേഖലകളിൽ കൈവച്ചു ശരാശരിക്കുമേൽ തൃപ്‌തികരമായി അവ ചെയ്തുകൂട്ടി. മൈക്രോസോഫ്റ്റിനെ പ്രതിനിധീകരിച്ച് ഒട്ടനവധി കോൺഫറൻസുകളിലും മറ്റും പങ്കെടുക്കാനും സംസാരിക്കാനും സഹായിക്കാനും അവസരമുണ്ടായി. ആർട്ടിഫിഷ്യൽ ഇന്റലിജൻസ് ഉപയോഗിക്കുന്ന ആദ്യത്തെ കവയിത്രി/കലാകാരിയായ ഓറിയകാത്തിയുടെ ഉപജ്ഞാതാക്കളോട് (സ്ലീബ, ഫാബിൻ) ഔദ്യോഗികനിലയിൽ സഹകരിക്കാൻ ഇടയായി.

എന്നാലും വ്യക്തിപരമായി പശ്ചാൽഗതിയായിരുന്നു. ഒരു മാസം ഒരു പുസ്തകം എന്ന ലക്ഷ്യം ഇത്തവണയും നടന്നില്ല. മൂന്നുനാലു പുസ്തകങ്ങൾ വായിച്ചു തുടങ്ങിയെങ്കിലും ഈ വർഷം ഒന്നും വായിച്ചു പൂർത്തിയാക്കിയില്ല. ജോലിത്തിരക്കും ജോലിസംബന്ധമായ യാത്രകളും കാരണമായി പറയാം. ഈ അവസ്ഥയ്ക്കു ഉടനേ മാറ്റമുണ്ടാവാൻ സാദ്ധ്യതകാണുന്നില്ല.
ലീസ, ജോജോ എന്നിവരുടെ നേതൃത്വത്തിൽ സീയാറ്റിലിൽ നടത്തിയ 'മുദ്രാംഗുലീയം' ഡാൻസ്-ഡ്രാമയിൽ വളരെചെറിയൊരളവിൽ പങ്കുകൊള്ളാൻ അവസരം കിട്ടിയത് നന്ദിയോടെ ഓർക്കുന്നു.

സോക്കർ കളിച്ചില്ല. പതിവുപോലെ സോക്കർ പാർട്ടിയിൽ പോയെങ്കിലും പ്രസംഗിച്ചില്ല. ക്രിക്കറ്റ് കളിച്ചെങ്കിലും സംഭവം അവസാനിപ്പിക്കാൻ സമയമായി എന്ന തോന്നലാണ് ബാക്കി. വോളീബോൾ ഒന്നുകൂടി ഊർജ്ജിതമാക്കണം.
ഫേയ്സ്ബുക്കിൽ ഒരാഴ്ച ഒരു പടം പബ്ലിഷ് ചെയ്യണം എന്ന ഒരു മാരണത്തിൽ പെട്ടുപോയി. അത് അവസാന ആഴ്ചകളിൽ പലകാരണങ്ങളാൽ മുടങ്ങിക്കിടപ്പാണ്. പൊതുവേ ഫോട്ടോ എടുക്കാനുള്ള ഉത്സാഹം കുറഞ്ഞു.

തൂവാനത്തുമ്പികൾ ഈവർഷം ആദ്യം തന്നെ കണ്ടുതീർത്തു. അതിന്റെ "റിവ്യൂ"വിന് കിട്ടിയ പ്രതികരണം കൂടുതൽ പടങ്ങൾ കാണണമെന്ന മോഹമുദിപ്പിച്ചു. ആ ആവേശത്തിൽ നമുക്കു പാർക്കാൻ മുന്തിരിത്തോപ്പുകൾ കണ്ടുതുടങ്ങിയെങ്കിലും മുഴുമിപ്പിക്കാനായില്ല. ഉയരെ, ആൻഡ്രോയ്ഡ് കുഞ്ഞപ്പൻ, Marriage Story എന്നീ സിനിമകളേ ഈ വർഷം കാണാൻ പറ്റിയുള്ളൂ. മൂന്നും ഇഷ്ടപ്പെട്ടു. (റിവ്യൂ ഇടുന്നില്ല.) ആമസോൺ, നെറ്റ്ഫ്ലിക്സ് എന്നിവയിലൊക്കെയായി നൂറ്റിയമ്പത്തോളം പുതിയ മലയാള പടങ്ങൾ ഉണ്ടെന്ന് കേൾക്കുന്നു. കുമ്പളങ്ങി നൈറ്റ്സ്, വൈറസ്, പിന്നെ ആ പോത്തിനെപ്പറ്റിയുള്ള പടം എന്നിവയടക്കം ഒന്നും കണ്ടില്ല. ഓം ശാന്തി ഓശാനയെപ്പറ്റി (വീണ്ടും) രണ്ടുവാക്ക് നല്ലതു പറഞ്ഞതിന് തല്ലുകിട്ടിയില്ലെന്നേയുള്ളൂ.

(എഡിറ്റ്: ഉണ്ട, ലൂസിഫർ എന്നിവയും കാണേണ്ടി വന്നൂ, ഈ വർഷം. പെട്ടെന്ന് ഓർമ്മ വന്നില്ല.)

പട്ടകാലത്തിന്റെ സൂചനകൾ സുഹൃത്തുക്കളിലും പരിചയക്കാരിലും പ്രതിഫലിക്കുന്നു എന്നത് പ്രതീക്ഷയും നിരാശയും തരുന്നു. ശാസ്ത്രബോധത്തിനും മനുഷ്യത്വത്തിനും എതിരായി നിൽക്കുന്നവരുടേതു കൂടിയാണ് ലോകമെങ്കിലും സ്വന്തം മക്കളെയെങ്കിലും ആ വഴിക്കു വിടാതിരിക്കാനുള്ള വകതിരിവ് കാണിക്കണമെന്ന് 2019 ഓർമ്മപ്പെടുത്തിക്കൊണ്ടേയിരുന്നു.

പതിനെട്ടാം വാർഷികം

നവംബർ 11-ആയിട്ട് സ്രഗ്ദ്ധരയിൽ യമകമൊക്കെ വച്ച് ഒരു അലക്ക് അലക്കാം എന്നു വിചാരിച്ചിരിക്കുകയായിരുന്നു. അപ്പോൾ ഓഫീസിൽ പതിവിൽ കൂടുതൽ പണി.

ആദ്യവരിയിൽ "നിൻ സിമ്പതിയ്ക്കും പതിക്കും" എന്നു വേണമെന്നും ബാക്കി വരികൾ അതുപോലെ തമാശയയൊക്കെച്ചേർത്ത് തട്ടിക്കൂട്ടാം എന്നൊക്കെ ആഗ്രഹിച്ചിരുന്നു. മുടിയെപ്പറ്റി മിണ്ടരുത് എന്നതിനാൽ "മുടിക്കും മുടിക്കും" ആദ്യമേ വേണ്ടന്നുവച്ചു. തടിയെപ്പറ്റിയും മടിയെപ്പറ്റിയും ഒട്ടും പറയാൻ പാടില്ലല്ലോ. പിന്നെയുള്ളത് ചൊടിയാണ്. അതു മാത്രമായി അടിച്ചുമാറ്റിയാൽ ശീവൊളളിയുടെ പിൻതലമുറ പുറകേകൂടി അടിതരുമെന്നതിനാൽ അതിനും മുതിരുന്നില്ല.

ശ്ലോകമില്ലാതെ (പടവുമില്ലാതെ), സ്വയം പതിനെട്ടാം വാർഷികാശംസകൾ നേരുന്നു!

മക്കൾ മാഹാത്മ്യം

മക്കൾ മാഹാത്മ്യം എന്ന പേരിൽ പുതിയൊരു സീരീസ് തുടങ്ങുന്നു. മക്കൾ ഉള്ളവർ നിർബന്ധമായും വായിക്കുക. നിങ്ങളുടേതല്ലാത്ത മക്കളപ്പറ്റിയുള്ള വർണ്ണനകൾ നിങ്ങൾക്ക് എത്രമാത്രം അസഹനീയമാണെന്ന് പെട്ടന്ന് ബോദ്ധ്യപ്പെടും.

മാഹാത്മ്യം ഒന്ന് -- ഗെസ്റ്റ് വൈഫൈ

മകൾ: അച്ഛാ, എനിക്കീ വീഡിയോ കാണാൻ പറ്റുന്നില്ല.
ഞാൻ: വൈഫൈ പ്രശ്നമായിരിക്കും. നോക്കട്ടെ.
ഞാൻ വൈഫൈ ഡിസ്കണക്ട് ചെയ്ത് വീട്ടിലെ ഗെസ്റ്റ് network-ൽ കണക്ട് ചെയ്യാൻ നോക്കുന്നു.
ഇതു കണ്ടുകൊണ്ടിരുന്ന മകൾ: Guest? I am not a guest. I live here. I don't want guest connection.

(മാഹാത്മ്യം എന്നൊക്കെപ്പറഞ്ഞെങ്കിലും ഇത്തരം ചളികൾ ആയിരിക്കും. സബ്സ്ക്രൈബ് ചെയ്ത് ആസ്വദിക്കുക. അഞ്ചുപൈസ ചെലവില്ലല്ലോ. )

വിദഗ്‌ദ്ധന്‍

"എടാ, നീ ഇന്നലെ പമ്പ് ഓൺ ചെയ്തിട്ട് ഓഫ് ആക്കീലീ?"
"ഇന്നലെ രാവിലെ ആറരയ്ക്ക് വീട്ടിൽ നിന്നിറങ്ങിയ ഞാൻ തിരികെക്കയറിയത് രാത്രി പതിനൊന്നരയ്ക്ക്. ഇതിനിടയ്ക്ക് പമ്പ് ഓൺ ആക്കാൻ എനിക്കെവിടെ സമയം?"
"മെനക്കേട്. കുന്ത്രാണ്ടത്തിന് കൊഴപ്പം. ങ്ങക്ക് ഇവ്ട വന്ന് ഓരോന്ന് വൃത്യേടാക്കീട്ട് പോയാ മതിയല്ല്. ഞാനിനി എന്തോ ചെയ്യും?"
"എന്തു ചെയ്യാൻ? ഇലക്ട്രിഷ്യനെ വിളിക്കണം."

* * *

"അണ്ണാ, പമ്പ്‌ കേട്. ഇത് മാറ്റാൻ ഞാൻ അമ്മേരടുത്ത് പണ്ടേ പറഞ്ഞതാണ്."
"കേടെന്ന് നിനക്കെങ്ങനെ മനസ്സിലായി? ഒരു മിനിറ്റ് ഓടിയിട്ട് ട്രിപ്പ് ആവുകയാണല്ലോ."
"ശരിയാണ്ണാ. നോക്കട്ടെ... പമ്പ്‌ ഇപ്പോൾ 10 ആമ്പിൽ ആണ് കൊടുത്തിരിക്കണത്. അത് 16 ആമ്പ് ആക്കണം. അപ്പം ട്രിപ്പാവൂല്ല."
"ഇത്രനാളും 10 ആമ്പ്  ബ്രേക്കറിൽ ഒരു കുഴപ്പവും ഇല്ലാതെ ഓടിയതാണല്ലോ?"
"അതണ്ണാ, ലൈനിൽ വേറെ ലോഡ് കൂടി വരുന്നോണ്ടാണ്."
"നമുക്ക് ആ ലൈനിൽ വേറേ ലോഡ് ഇല്ലാതെ പമ്പ്‌ ഓൺ ചെയ്ത് നോക്കാം."
(ലൈൻ വീണ്ടും ട്രിപ്പ് ആവുന്നു.)
"എന്നാണ്ണാ, കപ്പാസിറ്ററ് പോയാന്ന് നോക്കട്ടാ?"
"നീയാണോ ഞാനാണോ ഇലക്ട്രിഷ്യൻ?"

* * *

അനന്തരം അദ്ദേഹം കരിഞ്ഞുണങ്ങിയ ഒരു കപ്പാസിറ്ററുമായി സ്റ്റേജിന്റെ വലതുവശത്തു നിന്നും പ്രവേശിക്കുന്നു.

* * *

വാർത്താമാദ്ധ്യമങ്ങളിൽ ജോലിചെയ്യുന്നവർക്കു മാത്രമല്ല, ഇലക്ട്രിഷ്യൻസിനും SDLC L100 ക്ലാസ് ഗുണം ചെയ്യും.
ലേബൽ: ഒരു വഴിക്കുപോവുകയല്ലേ, ഇരിക്കട്ടെ.

സ്വാമിയെ ഓർക്കുമ്പോൾ

1. എട്ടാം ക്ലാസ്സിലോ മറ്റോ പഠിക്കുമ്പോൾ രാജു നാരായണസ്വാമിയുടെ പേര് ചോക്കു കൊണ്ട് വീട്ടുചുമരിൽ എഴുതിയതോർക്കുന്നു (അന്ന് അത് കുറ്റമായിരുന്നില്ല). അയാളുടെ പേര് അച്ഛൻ പലപ്രാവശ്യം പറഞ്ഞത് ഓർക്കുന്നുണ്ട്. "ഹാ വിധി വല്ല ചേർക്കുഴിയിലും പൂഴ്ത്തുന്നു രത്നങ്ങളെ!" എന്ന് മുമ്പെപ്പോഴോ എഴുതിയതിനടിയിലായാണ് നാരായണസ്വാമിയുടെ പേര് എഴുതിയത് എന്നതും വ്യക്തമായ ഓർമ്മ.
2. മഹാത്മാഗാന്ധി യൂണിവേഴ്‌സിറ്റി ക്യാംപസിൽ സയൻസ് ഫാക്കൽറ്റി റെപ്പായിരുന്നപ്പോൾ ഫാക്കൽറ്റി ഉദ്ഘാടനം ചെയ്തത് അന്ന് കോട്ടയം സബ്-കലക്ടറായിരുന്ന രാജു നാരായണസ്വാമിയായിരുന്നു. (അക്കാര്യം ഞാൻ അച്ഛനെഴുതിയ കത്തിൽ പ്രത്യേകം സൂചിപ്പിച്ചിരുന്നു: "ചുമരിൽ പേരെഴുതിയ, ഓർമ്മയില്ലേ?" എന്നമട്ടിൽ.) എഴുതിത്തയ്യാറാക്കി, പലവട്ടം എഡിറ്റുചെയ്തെന്നു തോന്നിപ്പിക്കുംവിധം ഉചിതപദങ്ങൾ ചേർത്ത് കാച്ചിക്കുറുക്കിയ പ്രസംഗം. പ്രാസനിബദ്ധമായി കോമളവും കാല്പനികവുമായ ഭാഷയിൽ (എന്തിനെപ്പറ്റിയൊക്കെയോ) അരമണിക്കൂർ അദ്ദേഹം സംസാരിച്ചു. ചീഫ് ഗസ്റ്റായിരുന്ന കെ. എം. റോയ്-യുടെ ചിന്തോദ്ദീപകമായ പ്രഭാഷണം മാറ്റിനിറുത്തിയാൽ, സ്വാഗതം പറഞ്ഞ എന്റെ പ്രസംഗമാണ്, പക്ഷേ, എനിക്കിഷ്ടപ്പെട്ടത്. 
3. ജീവിതം എത്രമാത്രം പ്രെഡിക്ടബിൾ ആണ്!

അമ്മേ!

ഞാൻ: അല്ല, കാശു വല്ലതും...?
അമ്മ: ഏയ്, എനിക്കെന്തിന് ഇപ്പോൾ പൈസ?
ഞാൻ: അതല്ല, കുറച്ചു കാശ് എനിക്ക് തരാൻ ഉണ്ടോന്ന്?
അമ്മ: ?#

കണ്മുന്നിൽ ഒരാൾ ഇല്ലാതാവുമ്പോൾ

2019 മാർച്ച് 9

രാത്രി പതിനൊന്നരയ്ക്കടുപ്പിച്ചാണ് സുഹൃത്തിന്റെ മരണമറിയിച്ചുകൊണ്ടുള്ള ഫോൺ വരുന്നത്.

“ഉറങ്ങിയിരുന്നോ?”
“ഇല്ല. പറയൂ...”
“--- മരിച്ചുപോയി. നാട്ടിലായിരുന്നു. Heart attack.”
“ങേ? എന്ത്?”
“---. വിശദമായി പിന്നെ.”

ഞാൻ മരവിച്ചിരുന്നു.

ഒരാൾ എന്നെന്നേയ്ക്കുമായി മറഞ്ഞുപോകുന്നു. സാമൂഹികമായി പ്രധാനമെന്നു നമ്മൾ കരുതുന്ന ആഘോഷങ്ങളിൽ മരിച്ചയാളിന് ഇനി പങ്കാളിയാവാൻ പറ്റില്ലല്ലോ എന്ന വിചാരം സങ്കടത്തിന്റെ ആക്കം കൂട്ടുന്നു. അച്ഛൻ മരിച്ചപ്പോൾ ഞാൻ ആദ്യം ഓർത്തത് അദ്ദേഹത്തിന് കൊച്ചുമക്കളെ കാണാനുള്ള യോഗമില്ലാതെ പോയല്ലോ എന്നാണ് (ഇപ്പോഴും മകൾ ചോദിക്കും അപ്പൂപ്പൻ അവളെക്കാണാതെ എന്തിനാ മരിച്ചത് എന്ന്).

അടുപ്പമുള്ളവരിൽ ചിലർ മരിച്ചകന്നുപോയതനുഭവിച്ചതു കാരണം മരണം ജീവിതത്തിന്റെ ആഘോഷമായിരിക്കണം എന്ന നിലയിൽ മനസ്സിനെ പതം ചെയ്തിട്ടുണ്ട് ഞാൻ. അസ്സാന്നിദ്ധ്യം മൂലം വിഷമിക്കാനിടയുള്ള ചിന്തകൾക്കും ഓർമ്മകൾക്കുമുപരി പരസ്പരം പങ്കുവച്ച സന്തോഷത്തിന്റേയും സുഖാനുഭവങ്ങളുടേയും വിചാരങ്ങളാണ് മരണം മുന്നിൽ തെളിയിക്കുന്നത്. ഓരോരുത്തരും ഉറ്റവരുടെ മരണം ഓരോ രീതിയിലാണ് കാണുന്നത് എന്നതിനാൽ "മരിച്ചവരുടെ ജീവിതം ആഘോഷിക്കൂ" എന്നു പറഞ്ഞ് ആശ്വസിപ്പിക്കുന്നതിൽ അപാകതയുണ്ടല്ലോ.

വേണ്ടപ്പെട്ടവർ ഇല്ലാതാവുമ്പോൾ ആ നഷ്ടങ്ങൾ സഹിക്കാനുള്ള കരുത്തുണ്ടാവട്ടെ.